KHAWTHLIR

Central YLA-in Ruihhlo sawiho
Young Lai Association-a Central YLA hruaitute leh Lawngtlai khawpuia YLA branch office bearer-te chuan nimin khan CYLA Office-ah ruihhlo do chungchang leh non-tribal chungchang an sawiho. Inkawmhona hi CYLA vice president leh kumpuan chairman F Lalrothanga'n a kaihruai a; an thil sawihote zingah CYLA leh branch YLA-in an bawhzui tur a awm nual a ni.

Kawng khâr dawn
Vaivakawn aṭanga Ropaiabawk via Zohnuai kawng chu lei tlahniam vanga a khîk avangin vawiin leh naktuk hian siam a ni dawn a, kawngpui hi siam chhungin khâr a ni dawn tih Aizawl Traffic SP Rodingliana Chawngthu chuan a tarlang. Hna thawhna dîp theia kawngpui sira lirthei leh bungrua dah phal a ni lo.

Lunglei DC-in Gutkha khap
Lunglei bawrhsap Kulothungan A chuan tun hnai khan Lunglei district-ah gutkha leh gutkha aṭanga thil siamte kawl, zawrh leh hralh khapna thupek a tichhuak. Thupek bawhchhiate chu IPC Section 188 hmanga hrem theih an ni.

Dy. Speaker-in Clinic hawng
Assembly deputy speaker Lalrinawma chuan nimin khan a bial chhung, Darlawng khuaah Health Clinic Centre thar a hawng. Lalrinawma chuan, "Zirna, eizawnna leh hriselnate hi ka ngaih pawimawh ber berte an ni," a ti a; Centre thar chu hmang ṭangkai a, a hmunhma enkawl zuinaah theihtawp chhuah turin mipui a chah.

NIT-in hun hmang
NIT, Mizoram chuan India ramin zalenna a hmuh champha vawi 75-na lawmna, Azadi Ka Amrit Mahatsov bawhzuina atan nimin khan Tourist Logdge, Chaltlangah hun an hmang a, Counter Insurgency and Jungle Warfare School (CIJWS) commandant Maj.Gen. Rajeev Thapar-in a hmanpui. He hunah hian CIJWS, Vairengte leh NIT, Mizoram thawhhona neih rawt a ni a, bawhzui tura hmalak remtih a ni.