KHAWTHLIR

Seventhday Adventist ṭhalai pawl, Adventist Youth Federation (AYF), Aizawl East Branch chuan nimin khan Aizawl Civil Hospital-ah thisen unit 62 an pe a, petute mipa 48 leh hmeichhia 14 an ni a; individual donor mi pariat an awm bawk. Lawngtlaia Excise & Narcotics department-a thawkte pawhin Lawng­tlai District Hospital-ah thisen unit sarih an pe a, petute mipa paruk leh hmeichhia pakhat an ni.

Aizawl DC leh Kolasib DC-te chuan, Myanmar rama Kenbo bike (1-2-5 bike) neitute'n Mizoram registration number lem hmangin Mizoram chhungah dan loin sumdawnna an kalpui thu an tarlang a, Kenbo bike chu sorkar laipuiin India ram chhunga lâk luh a phal loh a nih thu, thuchhuah siamin an puang. Dan bawhchhiate chu hrem theih an nih thu an tarlang bawk.

Mamit SP chuan thupek chhuahin,  Bairabi - Zamuang inkara Teirei lei (bailey bridge) siam­ṭhat tawh chu a foundation a la ngheh tawk loh avangin nimin aṭanga May 30, 2020 thleng 407 truck leh a aia lian tan zawh phal a nih loh thu a tarlang.

Nimin, May 1 kha International Labour's Day a ni a, May Day tih ṭhin a ni. He ni pual hian Aizawl, Mimbung, Ngopa, New Vaikhawtlang, Kawlbem leh Hnahlana awm Assam Rifles sipaite chuan AR 23 Sector puihnain mipui hnenah ei tur, tui in tur leh buhfaite an sem a ni.

Covid-19 dona atana hman turin nimin khan Chief Minister's Relief Fund-ah pawl pangain Rs. 2,51,180 an thawh a, online hmanga thawh an awm nual bawk. Hripui dona atan CM Relief Fund-ah hian cheng nuai 700 chuang a lut tawh a ni.

Kolasib-a Agriculture department (R&E) hmalaknain nimin khan Krishi Vigyan Kendra (KVK) Complex-ah Kolasib Vengthara loneitu 130 hnenah thlai chî sem a ni. KVK senior scientist Dr Michelle Lallawmkimi chuan, Covid-19 vanga inkhàrkhip kalpui mek a nih laiin, loneitute'n thlai thar kawngah harsatna an tawh loh nan hmalak mek a nih thu a sawi.

Siahaa DAY-NULM leh District Child Protection Unit-te chuan nimin khan Sia­haa naupang fahrah enkawlna home pathum - Grace Children Home, Orpha­nage Boy's Home leh Ebenezer Children's Home-te chu hmunhma tihfaina (disinfectant) hmangin an phuh fai. Hmai tuamna, kutkawr, kut tihfaina chi hrang hrang - hand sanitiser, dettol soap, liquid hand­wash, spray bottle leh hypo­chlorite-te an pe nghal bawk.

Bawngthah khua chuan nimin khan Republic Veng Local Task Force hnenah chawhmeh chi 36 an pe a, hengte hi Republic Veng LFT-te chuan veng mipuite hnenah a thlawnin an sem dawn. Bawngthah khaw hnenah hian Republic Veng hian dal bag 6, alu bag 3 leh motor hman man Rs. 5,000 an pe let.