Mizoram Carbon Product thubuai High Court-in a ngaihtuah ṭan

Gauhati High Court (GHC), Aizawl Bench chuan nimin khan Mizoram Carbon Product Ltd.-in transport subsidy an lak chungchang thubuai a ngaihtuah a; Mizoram sorkar chu affidavit thehluh hun atan chawlhkar ruk chhung hun a pe.

Vanramchhuangi, Chaltlang chuan Mizo Carbon Product Ltd.-in transport subsidy an lak danah thil dik lo a awm ngeia a hriat avangin, GHC Aizawl Bench-ah hian PIL a thehlut a, chu chu High Court chuan pawmin, nimin khan a ṭum khatna atan a ngaihtuah a ni.

High Court-ah hian Mizoram sorkar aiawhin principal advocate Vishwajit Deb dingin, Mizo Carbon Product aiawhin ukil PD Nair a ding a, Vanramchhuangi aiawhin a ukil C Lalramzauva leh a thawhpuite an ding thung.

Ukilte hnen aṭanga thu dawn danin, sorkar ukil Vishwajit Deb chuan, Mizo Carbon Product chu Anti Corruption Bureau (ACB)-ten an chhui mek a nih thu te, chargesheet-ah hming lang tur eng emaw zat an awm tawh thute leh, a ṭul chuan Mizoram sorkarin Central Bureau of Investigation (CBI) chhui tura a remtih thute a sawi.

High Court judge Justice Michael Zothan­khuma chuan ukilte thusawi a ngaihthlak hnu­ah Mizoram sorkar chu chawlhkar ruk chhunga affidavit thehlut turin a hriattir a; chawlhkar ruk hi August 31, 2017-ah a tawp ang.

He thubuai chungchangah hian Lal Thanhawla, Lalsawta, H Rohluna leh Zodintluangate chu Court chuan an hming ringawta tarlan a rem ti loa, hei vang hian an dil angin Vanramchhuangi ukilte chuan sorkara an nihna nen thubuaiah hian an ziaklut ṭha leh dawn a ni.

Mizoram sorkar hnuaia state level committee (SLC) chuan Mizo Carbon Pro-duct tan hian sorkar laipuiah ṭanpuina cheng vbc. 3.4 a dilsak tawh a ni.