Vairengte Auto Rickshaw Association-te MNF ṭhalaite'n chawimawina an hlan

MNF ṭhalaite chuan Vairengte Auto Rickshaw Association (VARA) hnenah Mizoram humhalh nana an thawh ṭhat avangin nimin khan Vairengte-ah chawimawina an hlan.

MNYF president Lalrinawma, MLA chuan, chawimawina an hlan chuan Mizo ṭhalaite rilruah ram leh hnam humhim duhna thin­lung tuh se an duh thu a sawi.

VARA chawimawina inkhawm hi Vairengtea Forest IB-ah neih a ni a, MNYF Presi­dent-in chawimawina a hlan a ni. Lalrinawma chuan, ram humhalh turin luah a ngaih thu sawiin, "Ram kan luah sên loh hian ram ruakah mi dang an lo awm ṭhin a, chutianga mi dang tana hmun kan ken avangin ramri buai a awm ṭhin a ni," a ti.

Lalrinawma chuan, mi thiam­te'n boundary pahnih - political boundary leh cultural boundary a awm an ti ṭhin tih sawiin, "Political boundary chu zauh belh a harsat laiin, cultural boundary chu a zau zel thei. Ram ṭha tak kan nei a, hei lo hi ram dang kan neih loh avangin kephah tiat lek pawh hi a hlu em em. Kan ram leh hnam humhalhna kawngah tê lua leh lian lua a awm lo a, kan ram tana beitute chawimawina kawngah ṭhalaite hi kan ṭhanharh a ngai a ni," a ti.

Chawimawina inkhawmah hian MNYF hmunpui aṭangin President bakah, vice president Lalremruata Chhangte, treasurer Lalzahawma Khiangte leh hruaitu dang paruk an kal a, Kolasib-a MNYF hruaitute'n an ṭawiawm. Vairengte daia auto rickshaw stand an tlawh a, VARA president Robert Tlangthangliana'n an hmalak ṭhin dante a sawi a ni.