Lirthei kal theih hun bithliah

Champhai DC Van­lalngaihsaka hoin sorkar hotute'n July 11, Thawh­lehni khan Tuivawl lei chhaka leimin vanga Champhai panna kawnga harsatna awm an enfiah a; leiminna hmuna lirthei kal theih hun an bithliah nghal. Kawng chhak aṭanga leimin hi PWD-in an paih mek a ni.

Sorkar thuchhuah tar­lan danin, Tuivawl lei chhaka kawng chhak minin khualzinte tan harsat-na tam tak a thlen ṭhin avangin PWD hmalaknain a chhawrdawh (benching) chhâwng thumah siam a ni. Chhawrdawh an siam chuan lei min belh theiin kawng a hnawh ping tur chu a veng thei dawn niin PWD hotute chuan an sawi.

PWD superintending engineer Lalruata Sailo sawi danin, Seling-Cham­phai inkar hi kum 2014 khan National Highway-a puan ni tawh mah se, April 1, 2017 khan Mizoram PWD kuta hlan a ni. PWD kuta hlan a nih hma kum 2014-2017 inkar chhungin Border Roads Organization (BRO) lamin kawng an enkawl tawh lo a, PWD kuta a awm bawk si loh avangin kawng enkawl chungchangah harsatna a awm a ni.

April 1 ,2017-a PWD kuta hlan a nih hnuah theihtawp an chhuah a enkawl a ni.

Leiminna hmuna lirthei kal theih hunbi siam a ni a, Aizawl/ Seling lam pan tan chawhma dar 11-12 leh chawhnu dar 4-5 inkar­ah kal theih a ni ang a, Champhai/Kawlkhulh lam pan tan chhun dar 12 -1 leh chawhnu dar 5-6 inkarah kal theih a ni ang.