ACCJSU-in graduate topper-te chawimawi

Aizawl City College Joint Students’ Union (ACCJSU) chuan, nimin khan Vanapa Hall-ah Mizoram University hnuaia graduate tharte zinga subject topper-te chawimawina hun an buatsaih a; minister R Lalzirliana'n a hmanpui.

R Lalzirliana chuan, 'Tumna a awm chuan kawng a awm' tih a nih thu sawiin, zirlaite chu nu leh pate thawhrimna ei ral mai mai lo a, ṭhahnemngai taka lehkha zir a, dinhmun ṭha zawka inhlangkai tur leh mahni dinhmun mila inchei ṭhin turin a fuih a; ram hruaitu tur an la nih dawn avangin paukhauh leh chhel taka harsatnate hmachhawn turin a chah.

Minister chuan, zirna lama hlawhtlingte chawimawina hun buatsaih a ni chu lawmawm a tih thu sawiin, "Chawimawi tlakte chawimawi hi mihring nun zia dik tak a ni," a ti.

ACCJSU hi November 22, 2000-ah din niin, Aizawla college 10-a students' union-te an tel a; nimina chawimawina hun-ah hian MZU-a under graduate exam-a subject/department 23-a ti ṭha berte hnenah chawimawi an hlan a ni.