Kan tih tur MNYF-in min tih khalh - ZNP Ṭhalai President

ZNP ṭhalai president Lalmuanpuia Punte chuan, MNF ṭhalaite'n nimina Vairengte Auto Rick-shaw Association hnena chawimawina an hlan chu ZNP ṭhalaite hmalak tumna tih khalh an duh hrim hrim vangah a puh.

Lalmuanpuia Punte hian nimin khan ZNP pisaah thuthar thehdarhtute a kawm a; MNF party chu kum 10 an sorkar chhunga Mizo nationalism leh ramri ngaihthah-ah puhin, "Chutih laiin, Vairengte auto-rickshaw hoin Cachar lam pana an stand an tawlh thla zela ramri an zauh ṭhin chu ropui kan tih vanga ZNP ṭhalaiin chawimawina hlan kan tum mek lai a, a hmaa tumna nei lo MNYF-in ZNP ṭhalai tih khalh tum ngawr ngawra vawiina chawimawina hlan tura an liam rum rum hi a mak kan ti hle," a ti.

ZNP ṭhalai President chuan, party dangte tih khalh tum vang ringawt ni lo a, anmahni thua zam ṭha taka Mizo nationalism leh ramri chung-changa hma la ve zel ṭhin tawh turin MNYF a phût a; Vairengte Auto Rickshaw Association chu chawimawina la hlan tho an tum thu a sawi.

Lalmuanpuia Punte chuan, MNF sorkar lai, March 9, 2006-ah Legislative Assembly-in Boundary Commission din rawtna official resolution a pass a, mahse, a zûzî tak thu te; MZP-in ramri humhalh nana June 20, 2007-a Vairengte thlanga Zorun an sak chu MNF sorkarin a ṭhiahsak thu te; Bairabi lui bula Assam Police-in outpost an sak thar tihchhiatsaktu Bairabi MZP hruaitute MNF sorkarin an man thu te; kum 2008 tir lama Ch.Chhunga, Ex-CM leileta a fapa Chal-thanzawna’n hna thawk laiin Assam Police-in kut an thlak chu MNF sorkar-in a hum ngam loh thute a sawi bawk.