Tualchhung sorkar tichak tura hmalakna duh

Chhimbial Chhantu chuan thu-chhuah siamin, Mizoram sorkarin V/C-te tihchakna tura Indian Constitution siamṭhat 73-na zûlzuia tualchhung sorkar ṭha leh awmze nei zawk siam tuma hma a lak mekna an thlawp thu an tarlang.

Chhimbial Chhantu chuan, 14th. Finance Commission-in kum 2015-2020 chhung atan Mizorama V/C-te hman tur sum leh pai a pe ve lo tih tarlangin, "14th. FC hian tualchhung sorkarte'n kum 2015-2020 chhunga an hman tur-in basic grants-ah vbc. 69715.04 leh performance grants-ah vbc. 17428.76 a dah a, heta ṭang hian Mizorama V/C-te'n sum dawn tur an nei ve lo," a ti.

Chhimbial Chhantu tarlan danin, 14th. FC ruahman anga Mizorama V/C-te'n sum an dawn loh chhan chu Indian Constitution 73th. Amandment angin Mizoramah panchayat a awm ve loh vang a ni.

Municipality awmna Aizawl khawpuiin sorkar laipui aṭanga sum a hmuh hmanga hmasawnna a kalpui mek laiin, V/C dinna khuate’n hmasawnna lang tham an nei ve dawn lo tih tarlangin Chhimbial Chhantu chuan, "Hetiang renga kan kal tur hi kan duh lo tak zet a ni. Mizoramin hmasawnna rualkhai zawk kan neih theihna tur atan sorkar laipuiin a pawm theih tura kan V/C hi kalpui a hun tawh a ni," an ti.