Police officer tharte'n CM an kâwm

Sardar Vallabhai Patel National Police Academy-a police officer training mek, mi 16-te chuan nimin khan chief minister Lal Thanhawla a pisaah an kâwm.

Chief Minister chuan, police officer chu hun kal zel turah an koah mawhphurna sang tak a awm dawn tih hrilhin, "Ram leh mipui tan hleih nei lo a, mi hausa leh mirethei thliar loa mipui rawngbawlsak tum ang che u. India rama cheng khua leh tui ṭha leh a bik takin sorkar hnathawk leh mipui rawngbawl hna thawkte tan ram kilkhawr ber chanchinte pawh hriat a ṭul," a ti a; an kal zelna turah duhsakna a hlan.

India rama inenhranna awm ṭhin chu amah ngei pawhin a tawn tawh thu sawiin Lal Thanhawla chuan, "India mipui náwlpui hian he ram ropui tak hi mihring chi thum – Aryan, Dravidian leh Mongloid-te chenna a ni tih leh, hengte hi inang khatin ram neitu kan ni tih pawm a ṭul," a ti a; police officer tharte chu en-hranna nei loa hna thawk turin a chah.

Indian Police Service (IPS) training mek mipa 11 leh hmeichhia pahnih bakah, Royal Bhutan Police officer trainee pahnih leh Maldives Police officer trainee pakha-te'n Chief Minister hi an hmu a ni.