KHAWTHLIR

Nuai 598 hu Rangkachak man
Land Custom Station, Zokhawthar leh Champhaia Customs-te ṭangkawp chuan nimin khan Melbûkah rangkachak tlang 20 an man a, a neitua puh C Lalpekhlua s/o C Lallawmzuala, Zokhawthar nia insawi an man bawk. Rangkachak tlang khat hi kg. khat zel a ni a, a vaiin cheng nuai 598 vel hûa chhût a ni.

Sangha chi hralh
Thenzawla sorkar Fish Seed Farm aṭangin nimin khan sangha note mamawhte hnenah sangha no hralh chhuah a ni a, Fisheries secretary Thlamuana'n a hmanpui. Fish Seed Farm aṭang hian kum 2016-17 chhung khan sangha notê 3,35,000 thar chhuah a ni.

Street Walk
Election Commission of India thupek anga kum 18-21 inkar, electoral roll-a la awm lote thun luh rûnpui, Special Drive neih meka hma-lakna chi khat atan July 11, Thawhlehni khan Kolasib-ah Street Walk leh campaign buatsaih a ni. Chawhma lamah high school, higher secondary, college leh DIET zirlaite'n an sikul/college aṭangin placard leh slogan nen kawng an zawh a, Diakkawn YMA Hall-ah kalkhawmin, campaign neih chhunzawm a ni.

Lungleiah seminar
Lunglei College-a Career and Counselling Cell chuan, Thawhlehni khan an college-ah ‘Seminar on Career Opportunities in Civil Services’ an buatsaih a, MPSC chairman PC Lawmkunga'n a hmanpui. Seminar-ah hian zirlaite zawhna chu MPSC Chairman hian a chháng a ni.

Lehkhabu tlangzarh
Mizoram Science Congress 2016 a mi thiam hrang hrangte thuziak, research paper lehkhabua siam - Mizoram Science Congress 2016 Proceedings chu Thawhlehni khan Aijal Club-ah chief scientific officer Dr. RK Lallianthanga'n a tlangzarh. Mizoram Science Congress 2016 Proceedings bu ah hian mi 154 thuziak a awm a ni.