Rs. 300 dila sawiah FIR thehluh a ni Rs. 3,000 aṭangin Rs. 300 kan dil lo - LBAM

Mizoram Building & Others Construction Workers Welfare Board (MBOCWWB) chuan, an hnena inziak lut, ṭanpuina pawisa an pekte aṭangin Rs. 300 dil ṭhin an awm nia sawi chungchangah nimin khan Aizawl Police Station-ah FIR an thehlut.

Hetih lai hian, Labour Beneficiaries Association Mizoram (LBAM) chuan thuchhuah siamin, Covid-19 léng leh inkhàrkhip vanga MBOCWWB-in an member-te Rs. 3,000 an pek aṭangin Tuichangral lamah Rs. 300 an dil loh thu an tarlang.

LBAM chuan, April 30, 2020-a Vang­laini chhuakah, Tuichangral lamah Mizoram sorkarin Covid-19 vanga MBOCWWB member-te hnena Rs. 3,000 ṭheuh a thun aṭangin Rs. 300 dil ṭhin an awm anga chhuah a nih thu tarlangin, "Hei hi thu belhchian dâwl lo a ni tih Zoram mipui kan inhriattir a ni. Kan pawl hian member kan lâk emaw, hamṭhatna member-te kan bill sak hian buaipuina senso hi member-te nen inremsiamna kan neih angin lâk ṭhin a ni thung," an ti.

Tunlai hian MBOCWWB member-te account-ah pawisa thun mek a nih thu tarlangin LBAM chuan, "Keini lam hian kum 2019 chawhnu lama member thar kan lakte chu Krismas dawn a nih avangin pawisa induhthawh lai a ni nen, kumthar lamah buaipui velna senso hi lak mai ni se kan ti a, kum a rawn thar a, member lamte an lo inhmang da leh bawk nen, kan han nghâk leh hret a ni," an ti a; labour ID pawh Champhai Employment Exchange lamah lam a lo hun tawh si avangin buaipuina senso tur pawisa thawhkhawm ila tiin Whatsapp group-ah rawt a nih thu an tarlang.

LBAM tarlan danin, member-te'n pawisa thawh khawm zat tura an thutlukna chu Rs. 300 a ni. Pawisa thawh khawm hun leh beneficiary-te account-a Rs. 3,000 thun luh hun a inang a, mi ṭhenkhatin pawisa cut anga an ngai chu a àwm tihna chen an nei a ni. 

Tun thlaah vek Rs. 3,000 dawn tur aṭanga Rs. 300 cut tur anga puh an lo ni tawh a, thil hriat sual an neih avangin a puhtute hian ngaihdam dilna pawh an tichhuak tawh a ni.

Rs. 300 chu Rs. 3,000 aṭanga indil luih ni loin, Khawhai leh a chhehvel khua, Lungtan, New Chalrang, Chalrang, Vangtlang, Sialhawk leh Tlangpui khuaa member tharte registration buaipuina tura thawh khawm a ni a, Rs. 3,000 an dawn aṭanga dil luih an ni lo niin an sawi. Vah velna atan sum senso a hautak avangin member-te'n Rs. 300 thawh khawm rem an ti niin an sawi bawk.

Hetih lai hian, heng thil vel avang hian MBOCWWB hotute chuan Aizawl PS-ah FIR an thehlut a; Welfare Board-in an beneficiary-te hnena Rs. 3,000 pek aṭangin Rs. 300 dil a ni em tih finfiah turin an ngen a ni.