Mask ṭhui hnatlang

Aizawl East-II bialtu MLA Robert Romawia Royte, minister of state-in MLA fund hmanga a lei puanṭhui khâwl dawngtute chu nimin khan KVM High School, Chhinga Vengah hmai tuamna (mask) ṭhuiin an hnatlang.

Hna­tlang ṭan hmaa inkhawm tâwi buatsaihah Robert Romawia chuan, inkharkhip thlahdulin, páwn chhuak thei an tam telh telh hunah hmai tuamna a pawimawh telh telh dawn thu sawiin, "Puanṭhui khawl hi mask ṭhuina atan chauh a ni lo a, tunah chuan mamawh an tam hun lai a ni. In tan a ni lo a, ka tan pawh a ni lo a, a mamawhte tan in hnatlang a, a lawmawm hle a ni," a ti. Hnatlanga thawk chhuakte hi mi 50 vel an ni a, hmai tuamna ṭhuina hmanrua pek an nih bakah, TA/DA pek an ni ang.