Mizoramah voter 7,99,328 an awm
Mizoram Electoral Roll thar chu nimin khan district tinah Bawrhsap, District Election Officer (DEO) ni bawkte'n an tlangzarh. Electoral roll thara a lan danin Mizoram pumah voter 7,99,328 an awm a, draft roll aiin voter 15,429 (1.97%)-in an tam zawk.
Mizoram Final Electoral Roll 2020 atana ennawnna hi Election Commission of India (ECI) thu angin nikum aṭangin ṭan a ni a, dilna hrang hrang thehluh nan December 16, 2019 aṭanga January 15, 2020 thleng hun hawn a ni. Final electoral roll chu nimin khan district tinah tlangzarh a ni a, roll thar chu political party hrang hrangte pek an nih bakah, Mizoram Election website https://ceo.mizoram.gov.in/ ah en theih a ni.
Mizoram Final Electoral Roll 2020 thar ang chuan, Mizoramah voter 7,99,328 an awm a, mipa 3,89,243 leh hmeichhia 4,10,085 an ni a; hmeichhia tam zawkin, mipa voter 1,000 zelah hmeichhia 1,054 zel an awm ang a ni. Mizorama district zingah Mamit district-ah chiah hmeichhia aiin mipa an tam zawk a, district dang zawngah chuan hmeichhia an tam zawk. Service voter 4,881 (mipa 4,817 leh hmeichhia 64) an awm.
Electoral roll hmasa aṭanga voter punna chu 15,429 a ni a, chu chu 1.97% a tling. Voter zat hi Mizoram mipui zawng zawng aṭangin 60.26% an ni. Electoral roll hmasaah mipa/hmeichhia nihna nei loa ngaih, third gender an tih mi tlem azawng an awm laiin, tuna electoral roll tihchhuahah erawh chuan third gender an awm lo.
Mizoram pumah polling station 1,222 a awm. Polling station tamna ber Aizawl district-ah 345 a awm a, a tlemna ber Serchhip leh Siaha district-ah 81 ve ve a awm thung.
Electoral Roll 2020 buatsaihnaah hian district thar pathum - Hnahthial, Khawzawl leh Saitual chu an district chhunga awm tur Assembly constituency tihfel a la nih loh avangin a hranpain an district bikah electoral roll tlangzarh a ni ve lo a; district thar hnuaia constituency awm turte chu state sorkar ráwn chung leh ECI thu anga la siam rem tur a ni.
Sorkar hotute sawi danin, Assembly constituency awm sa siamṭhat leh tihdanglam (delimitation) hi duh hun huna tih theih a ni lo a; kum 2002-a Indian Constitution siamṭhat (amendment) a nih ṭumin tuna Assembly constituency hi kum 2026 hnua chhiarpui awm leh hmasa ber zawhfel hnuah chauh tihdanglam theih a ni dawn. Kum 2031 hnu lamah chauh constituency siamṭhat theih a ni dawn tihna a ni.