Mizoramah kawngpui km. 7,632.6 a awm ; Zemabawk-Tuirial kawng chak zawka thawm ṭha turin contractor kan nawr ang - Thanzara

PWD enkawlnaa Chief Minister puitu minister Lal Thanzara chuan, NH-54, Zemabawk-Tuirial kawngpui chhia chu chak zawka thawm ṭha turin contractor-te an lo nawr tur thu a sawi. PWD engineer-in-chief R Vanlaltluanga chuan, Mizorama motor kawngpui zawng zawng thui zawng belhkhawm chu km. 7,632.6 a nih thu a sawi bawk.

Minister Lal Thanzara ho hian nimin khan CMO conference hall-ah PWD hotute leh thuthar thehdarhtu ṭhenkhatte an inkâwm a, Mizorama kawngpui dinhmunte an sawifiah.

Minister chuan, Zemabawk-Tuirial kawngpui chhia chu thawm ṭha turin contractor-te an lo nawr tur thu a sawi bakah, Bawngkawn-Durtlang kawng chu a enkawltu BRTF-in an thawm ṭhat theih nan BRO Chief Engineer an lo hriattir tur thu a sawi.

PWD E-in-C R Vanlaltluanga sawi danin, Mizoramah kawngpui km. 7,632.6-a thui a awm a, chu'ng zinga km. 4,662.6 chu Mizoram PWD enkawl niin, Border Roads Organisation (BRO)-in km. 896.315 an enkawl. Kawngpui km. 7,632.6 zinga km. 1,645.12-a thui chu National Highway a ni.

Mizoram PWD-in kawng a enkawlah lei (bridge) 124 a awm a, chu'ng zinga lei 50 chu NH kawngpuia mi niin, lei 74 chu state road-a mi a ni. State road-a lei 74 zinga 39 chu permanent bridge a ni a, lei 35 chu temporary bridge a ni thung.

PWD hian in (building) 3,076 an enkawl a, chu'ng inte zau zawng belhkhawm chu square metre 4,32,222.98 a ni a, in sak mek 145 an nei bawk.

R Vanlaltluanga chuan, Mizoram PWD-in 'Vision 2030' an nei tih sawiin, chumi hnuaiah chuan Mizorama temporary lei zawng zawngte chu permanent bridge-a siam vek tum a nih thu a sawi a, "Lei pariat siamna turin sanction kan nei tawh," a ti.

PWD Vision 2030-ah hian chhim leh thlang zawnga inkalpawhna kawng siam te, Aizawl khawpui hualtu ring road siam te, Aizawla ropeway siam te, district khawpui zawng zawng kawngpui double lane-a pawhtir te, Aizawl leh ṭhenawm state khaw­puite kawngpui four lane-a thlunzawm te, Lunglei ring road siam te, Aizawlah town­ship thar siam te, inland water transport tihchang­tlunte leh thil dang eng emaw zat a tel.

Thingtlang khuate pawh tura kawngpui siamna tur scheme, PMGSY chungchangah PWD E-in-C chuan, kum 2011 chhiarpuia Mizorama khaw awm zat 795 zinga 363 chu kawngpui ṭhain a la pawh lo tih a sawi a, "Khaw 363 zingah PMGSY hmanga kawng sial tlang theihna tura tling khua (mihring 250 leh a aia tam chenna chin) 253 a awm," a ti.

PWD E-in-C sawi danin, PMGSY hnuaiah hian project sanction tawh 273 awmin, chu chu km. 3,507.86-a thui a ni a, khua 192 a tuam a, sum rua-hman zat chu vbc. 1,526.41 a ni. PMGSY hnuaiah hian kawng km. 2,642-a thui laih a ni tawh a, khua 169 a pawh tawh.Tunah hian khaw 68 pawhtu tur kawng siamna turin DPR an siam mek bawk.

PWD chief engineer (Highway) K Lalsawmvela chuan, NH-54 Ṭhuampui-Tuirial kawng siam tura contractor thlan chu V Lalengzauva, Zonuam a nih thu sawiin, kawng a siam chak theih loh chhan chu sum lamah harsatna a neih vang niin a sawi a, "Kuminah ruahtui a tlak hma avangin kawngpui hrang hrang thawmṭhat turteah duh angin hna a thawh theih loh a ni," a ti.

PWD CE (Highway) sawi danin, Seling-Keifang inkar chu Nidhi Creative Infrastructure-in an siam a, mahse, ruahtui tlak hma vangin an la zo thei lo. Nidhi CI vek hian Kawlkulh-Khawzawl pawh an siam dawn a, Khawzawl-Champhai kawng pawh thawm ṭhat thuai theih beisei a ni.

NH-54 ah Buichali-Aizawl inkar siam turin tender chhuah nawn mek a ni a, Tuirial-Serchhip chu kum 2013-ah resurfacing tih a nih avangin tun maiah chuan tih theih a ni rih lo. Serchhip-Tuipang inkarah hna thawh mek a ni a, Rawpui-Tuipang bik chu resurfacing tih a ni tawh.

Champhai kawng, Tuivawl lei bula June 14, 2017-a leiminin kawngpui a hnawh chung-changah K Lalsawmvela chuan, tunah chuan tluang taka hna thawh a nih tawh thu a sawi a; leiminna chunga 132Kv power line tower chu a hlauhthawnawm avangin hmang tawh lo a, a thlunzawmtu tower pahnihte inkarah direct tum a nih thu leh, chumi thlunzawm chu Power & Electricity department-in an zawh thuai beisei a nih thu a sawi bawk.