NLUP kalpui zel a ni dawn - Lal Thanhawla

Chief minister Lal Thanhawla chuan, a kaihhruai sorkarin New Economic Development Programme (NEDP) kalpui mah se, NLUP chu an thlauhthla dawn lo tih a sawi a, "A mamawhte tan NLUP kalpui zel a ni ang," a ti.

Zo Carbon thubuaiah amah leh minister dang pathumte hming chu Court-in a paih niin a sawi bawk.

MPCC Executive Committee chu July 12, Nilaini khan Congress Bhavan-ah an ṭhukhawm a, MPCC president Lal Thanhawla, Mizoram chief minister-in a kaihruai a ni.

MPCC meeting-ah hian NLUP kalpui zel chungchang sawiho a ni a, member-te chuan NLUP chu miretheite inhnangfâkna ber a nih avangin kalpui zel an duh thu an sawi hlawm. Lal Thanhawla pawhin, NLUP chu kalpui zel a duh thu leh, mamawh an awm chhung chu kalpui zel a nih tur thu a sawi.

CM Lal Thanhawla chuan, mimal tute'n emaw Zo Carbon chungchangah High Court-a PIL an thehluh chungchang sawi­in, amah leh minister pathum hming lang vete chu case aṭangin Court-in a paih niin a sawi a, "High Court chuan Advocate-General of Mizoram ngenna angin a thaibo a ni," a ti.

Lottery chungchangah sawiin Lal Thanhawla chuan, "NLUP ang bawkin CAG report dik loh vangin thil dik lo awm angin a lang a ni," a ti bawk.