KHAWTHLIR

DC-in tlawh
Champhai DC Vanlalngaihsaka chuan, Champhai Dinthara Kendriya Vidyalaya sak mek a tlawh a, hna thawh dan a enfiah. Kendriya Vidyalaya hi July 2016-ah sak ṭan a ni a, March 2018-a sak zawh tura ruahman a ni. A sakna atana ruahman cheng vbc. 27.23 aṭangin vbc. 6.20 hmuh a ni tawh.

Fai bul ṭanna
Ramhlun South YMA Sanitation Committee chuan, nimin khan an veng YMA Hall-ah 'Fai Bul Ṭanna' inkhawm an buatsaih a, AMC mayor PC Lalhmingthanga leh bialtu councillor Laltlanzova Khiangte ten an hmanpui, veng chhung sikula zirlaite faina chungchang zirtir an ni.

SIRD-ah training
SIRDPR chuan nimin khan an auditorium-ah Aizawl leh Kolasib district chhunga field investigator, assistant field investigator, additional programme officer, technical assistant, computer operator leh village level administrative assistant-te tan 'Training on Cashless Transaction/Digital Payment for Special Gram Sabha' an buatsaih.

Thisen pe
Kolasib-a CZ Higher Secondary School NSS unit chuan, nimin khan Kolasib District Hospital-ah thisen unit 16 an pe a, a petute mipa 15 leh hmeichhia pakhat an ni.

Hostel hawng
Ministry of Tribal Affairs bultuma sak Govt KVM HS, Chhinga Veng-a Scheduled Tribe Girls’ Hostel chu nimin khan minister Lalsawta'n a hawng. ST Girls Hostel hi cheng nuai 337.54 senga sak zawh a ni.

Kaisang lawmpui
Mizoram State Group-D Government Employee Association chuan, nimin khan Transport directorate hall-ah an member pathum - Transport joint director R Lalrammawia, Health deputy director Lalnunvula leh Art & Culture deputy director Lalchuailova te chawimawina hun leh an kaisan lawmpuina hun an hmang.