Mizo hmeichiate'n Mizo tlangval ngei pasal An neih nan infuih thar a ṭul - MSCW Chairperson

Mizoram State Commission for Women (MSCW) chairperson Vanlalawmpuii Chawngthu, MLA chuan, Mizo hmeichhiate'n pasal atan Mizo tlangval ngei an neih theihna atan infuih thar a ṭul thu a sawi.

Keiṭum Branch YMA-in an branch kum 75 (platinum jubilee) tlin, July 12, Nilainia an khaw community hall-a an lawmna a hmanpuinaah Vanlalawmpuii Chawngthu chuan, Kei-

ṭum khaw nu leh pate chu an fanu leh tunute'n Mizo tlangval ngei pasal atana thlang tura fuih ṭhin turin a chah a, "'Kei zawng ka thlang Mizo val ngei, rilru hmun khat, duh thuhmun si,' ti ṭheuh thei turin kan fanu leh tu nute i fuih thar leh ang u," a ti.

Vanlalawmpuii chuan, Mizote'n hnam dang neih ve loh YMA an neih rual-in, entawn tlaka kan awm a ngaih thu sawiin, "NGO dangte ang loin he pawl hi chu Mizo zawng zawng lenna a ni. Chuvangin, entawn tlaka kan awm zel a pawimawh," a ti a; ruihhlo do kawngah YMA-in sorkar an pui ṭhin chu lawmawm a tih thu a sawi.

Ṭhangtharte zinga aia upate zah zirtir a ngaih thu sawiin MSCW Chairperson chuan, "YMA pawh nei ve lote hian Mizo aiin aia upate an zah mah emaw tih tur a ni a, hnam ropui leh changkang apiangin aia upa zah an ti na ṭhin," a ti bawk.

Keiṭum YMA platinum jubilee hi Central YMA hruaitute pawhin an hmanpui a ni.