Gorkha-te'n AB Acharya pualin hun hmang

Mizoram Gorkha Youth Association (MGYA) chuan, nimin khan Mizoram hmun hrang hrangah Adikavi Bhanubhakta Acharya pian champha vawi 203-na pualin hun an hmang a; Aizawlah chuan Lal Thanhawla Auditorium-ah hun hmangin, Kendriya GorkhaMandir Sanchalan Samiti president Uday Kumar khuallian a ni.

Aizawlah chuan AB Acharya pian champha puala Acharya thu leh hla phuahte bakah, thu leh hla lama tui mite'n thu leh hla pho chhuahna hun leh, Gorkha hnam ziaráng puanzarna Kavi Gosthi (seminar) an buatsaih a; sikul naupangte tan essay ziah leh lemziaka inelna an buatsaih bawk.

Adikavi Bhanubhakta Acharya hi Nepal rama Tanahu district chhung, Chundi Ramgha khuaah kum 1814-ah a piang a, thu leh hla lama thawh hlawk tak niin, Hindu lehkhabu thianghlim, ‘Ramayana’ chu Sanskrit aṭanga Nepali ṭawnga letlingtu a ni.

MGYA hi Mizorama Gorkha-te pawl lian ber niin, kum 1976-ah din a ni a; Aizawl chhungah branch 10, Aizawl páwnah sub-headquarter pakhat (Kolasib) leh branch panga an nei a, member 5,000 vel an awm.