Thenzawl rama Vantawng Khawthla Ft. 324.8-a sang a nih thu an puang

Zotrek Adventure Club leh Mission Veng Youth Adventure Club hruaitute chuan, kumin tìr lamah Thenzawl rama Vantawng Khawhthla chu an teh tih sawiin, a san zawng anga chhinchhiah ṭhin ft. 750 /751 chu a dik lo tih an sawi a; an teh dana a san zawng chu ft. 324.8 (metre 99) a nih thu an puang.

Zotrek Club leh Mission Veng Youth Adventure Club hruaitute hian nimin khan Aizawl Press Club-ah Mizorama tui khawh-thla sang zual ṭhenkhatte an teh dan an sawifiah.

An sawi danin, January 6-7, 2017-ah Vantawng Khawhthlaah mi 37 an kal a, an zinga mi 29 chu hrui hmangin Vantawng Khawhthlaah chuan an uai thla a ni.

Hemi ṭum hian hrui ft. 600-a sei an hmang a, an hrui hman chuan a daih zãn avangin tui khawthla san zawng anga chhinchhiah metre 229 (ft. 750 / 751) tih chu dik theiin an hre lo a; uluk leh chiang zawka teh ṭul an tih avangin February 4-ah an teh ta a ni.

Vantawng Khawhthla san zawng hi fimkhur leh uluk takin an teh a; measuring tape hmang (manual) leh khawl (altimetre) hmangin an teh a ni. "Khawvel leh Mizote'n Vantawng Khawhthla san zawng kan lo hriat dan leh kan lo pawm ṭhin dan kha a lo ni lo tawp mai tih kan hmuchhuak a, a san zawng hi metre 99 (ft. 324.8) a ni," an ti.

Vantawng Khawhthla an teh chu Mizo history tidanglam dâwrh thei a ni tih sawiin Zotrek Club hruaitute chuan, "Tun-ah hian ft. 750 tih a nih avangin, India rama tui khawhthla sang 10-na a ni a, mahse, a sân zawng hi a lo dik si lo," an ti a; a san zawng, ft. 750 tih chu khawi aṭanga chhuak nge, tute teh nge, tih hriat tumin a hre tura an rinte an zawt kual a, mahse, hre chiangtu an hmu zo lo tih an sawi.

Zotrek Club leh Mission Veng Youth Adventure Club hruaitute chuan, Mizoramah hian tui khawhthla sang a tam lo tih sawiin, "Kan hriat lâr chu Vantawng Khawhthla a ni mai a, hei pawh hi ram dangte ngaihtuahin a sang lem lo hle," an ti a; Mizorama tui khawthla sang zualte chu humhalh a, cheibâwl a, khualzinte tana thlawh chakawm leh hmuh nuam zawka siam a châkawm hlea an hriat thu an sawi.