Tlabung dist. siam phût thu puang nawn

Tlabung District Demand Committee (TDDC) chuan thuchhuah siamin, sorkarin Mizoram tan thil ṭha a duh tak tak a nih chuan Tlabung tan district puitling a pek ngei an phût tlat tih an tarlang a; district an neih theih nan hma an la zel dawn tih an puang.

TDDC chuan, district an dilna chu ṭhangkhat lian a ni tawh tih sawiin, chuti chunga district an la hmu lo chuan a tihrilhhai tak zet tih an sawi a, "Hun khirhkhàn leh chhiatrupna thleng thei dinhmun kan hmachhawn hian district kan mamawhna a tichiang zual hlein kan hria," an ti.

Bangladesh chu Tlabung aṭanga hla lo tê a ni tih sawiin, TDDC chuan, Bangladesh khawpui ber Dhaka leh khawpui dangah Covid-19 vangin damlo 7,000 chuang an awm mek a, a enkawltu doctor leh nurse zingah pawh hri vei hi mi 600 chuang an awm tawh," an ti a; Bangladesh mipuite chu sumdawnna leh sakhuana thilah an inkalpawh nasa tih an sawi.

Tlabung chu district hmunpui ni tawh se chuan awlsam leh chak zawkin Mizoram venhim hna kalpui theih a nih tur thu sawiin TDDC chuan, "Mahse, sub-division-ah pawh ngaihthah ber pawl a nih tlat avangin a luhaithlak tak zet. Sorkar tan ngaihtuahna thar sên hun tak niin kan hria a, chutiang ti tur chuan sorkar kan phût nawn leh a ni," an ti.