Zirtirtu eng emaw zat contract-in lak thar a ni dawn - Joseph Lalhimpuia

Parliamentary secretary (School Education) Joseph Lalhimpuia chuan, zirtirtu indaih lohna phuhrûkna atan contract-a thawk tur zir-tirtu eng emaw zat lak tum a nih thu a sawi.

Nimina Lunglei MSU-te'n Mizoram University hnuaia under graduate result chhuaka an district chhunga top 10-a tlingte Lunglei Convention Centre-a chawimawina hun an buatsaih a hmanpuinaah Joseph Lalhimpuia chuan, "Qualified teacher eng emaw zat contract-a lak tum a ni. Headmaster hna ruak pawh naupang zawkte'n an thawh theihna atan 50% chu Limited Department Exam hmanga lak a ni ang," a ti.

Joseph Lalhimpuia chuan zirlaite fuihna thu sawiin, "Chhim lam aṭang-in central service officer leh hna lian tak tak thawk mi eng emaw zat an lo chhuak tawh ṭhin a, an pension hnuah an hmun ruak luah tur an tlem ta hle," a ti a; zirlaite chu ṭan la thar turin a chah.

Mizoram chhungah kum tin Mizo ṭhalai 3,000 chuang graduate thar awm ziah ang a nih thu sawiin Parliamentary Secretary chuan, "State sorkar hnuaia hna awmte hian a daih sêng lo tih hriain, eng kawngin nge ei an zawn ang a, eng kawng nge an zawh dawn tih ngaihtuah chung-a rilru nei taka lehkha zir a pawimawh," a ti.

Zirlai chawimawina an hlante hi an vaiin mi 29 an ni a; Lunglei College aṭangin mi 14, HATIM aṭangin mi 12, JB College aṭangin mi pakhat leh Pachhunga University College aṭang-in mi pahnih an ni.