Supply Chain-a hmalakna thlirho

Chief minister Zoramthanga hoin nimin khan CMO Cabinet mee­ting room-ah Horticulture Development Board vice chairman F Lalnunmawia, MLA leh Horticulture department hotute'n Ve­getables and Fruits Supply Chain chungchanga hmalakna an thlirho.

CM Zoramthanga chuan, Covid-19 léng kara ei tura harsatna mipuiin an tawh theihna tur su­kiang turin Vegetables and Fruits Supply Chain chu tluang taka kalpui a ni tih sawiin, "Mizoram hi chaw leh ei tur dangah a intodelh a pawimawh. Hripui hian khawi ram economy pawh a tihbuai vek avangin ngai awh tura hma kan lakna turah SEDP hnuaia bul kan lo ṭan tawhna leh hmalak zelna tur nen intun dinna kawngah hma ṭha tak kan la thei dawn a ni," a ti.

Meeting hian, supply chain chu inkharkhip chhungin leh a ṭul dan ang zela chhunzawm turin a rêl. An tarlan danin, Mizoramah thlai chi ṭum hnih chah thlen tawh a ni a, cheng nuai 87 chuang man a ni. Tunah hian consignment thum chah mek niin, aṭul ang zela chah belh turin an rêl a; Sairang leh Khawzawla cold storage enchhin pawh a hlawh­tlin thu leh Serchhipa cold storage sak zawh tawh chu tih nun thuai ni se an ti bawk.

Kumin March 28 aṭanga April 30 thleng khan Aizawla veng 78-ah thlai leh thei lirthei phur 164 a thleng tawh a, home, rehabilitation centre leh veng pathumah phur 12 a thlawn a sem a ni tawh. Chu'nga thei leh thlai leina man  chu Rs. 1,03,22,161 a ni a, hralh lehna aṭangin Rs. 97,04,437 hmuh a ni.

Meeting-ah hian, Mizoramin pangpar a mamawh tam lai ber - Good Friday leh Easter Sunday lai velin inkhârkhip a nih avangin kum dang aiin sum hmuh nuai 200 velin a tlem tih an sawi.