CAG report a dik vek bik lo - Chief Minister

Chief minister Lal Thanhawla chuan, Comproller Auditor General (CAG) of India report chu a dik vek bik lo niin a sawi a, "An report hi Luka ziak ang bur a ni lo," a ti.

Lal Thanhawla hian nimin khan Congress Bhavan-ah thu sawiin, "CAG hi dik lo thei lo an ni bik lo. An report hi Luka ziak ang bur a ni lo. An dâwt chian zia chu, NLUP-ah baseline survey neih a ni lo, an ti a, YMA thawhpuiah sáwmin survey tih vek a ni," a ti. CAG report a dik loh thu an sawi ṭhin hua an awm chhan chu, CAG report bak ṭanfung tur an hriat loh vang niin a sawi.

Mizo Carbon Product chungchang chu ACB-in ngawrh taka an chhui mek thu sawiin Chief Minister chuan, "ACB-te hmalakna hi a ṭha hle. Officer thil ti dik lo tam tak hrem tur hming sorkarah an thehlut tawh a, hrem an nih theihna atan FIR pawh an thehlut tawh a ni," a ti.

Lal Thanhawla chuan, sorkarna an siam leh chuan BPL chhungkaw tin hnenah tui dahkhawlna tur an sem dawn tih sawiin, "Ramngaw chereu zelah tui a tlem a, tui tel loa kan nun theih si loh avangin a khâwlna tur ngaihtuah a ngai," a ti a; sorkar laipui pawhin ruahtui dahkhâwl chungchangah policy an neih thu a sawi.

Mizorama chengte zingah hnam hnufual bik an awm lo tih sawiin CM Hawla chuan, "Kan dikna chanvo pawh a inang vek. Zorama piang ṭheuh ṭheuh, ram leilung fa bik an awm lo a, inngaihlu tur bik kan awm lo," a ti.

MPCC President chuan, tun hnaia pawl ding thar Zoram Exodus Movement (ZEM) chungchang sawiin, "Doctor leh Reverend-te an ni fur a, keini ang tan chuan an huphurhawm hle. Mahse, sap ṭawng ka thiam ve dan chuan, exodus hi 'hruai chhuah' tihna a ni," a ti a; ZEM chuan khawiah nge Mizo mipuite an exodus pui dawn a hriatthiam loh thu a sawi.

Lal Thanhawla chuan, MNF-te chu an sorkar ṭum khatnaah sum siam dan an la hre lo a, an sorkar ṭum hnihnaah sum siam ringawt an buaipui zui ta tih sawiin, "A term hnihnaah an hria a, mirethei leh hausa kar a zau tulh tulh a ni. Zan khata hausa thutte an pung," a ti.