CBI-in Mizo Carbon Product an chhui a ngaih leh ngaih loh Court-in ngaihtuah dawn
Gauhati High Court (GHC), Aizawl Bench chuan, Mizo Carbon Product-in transport subsidy an lak dan Central Bureau of Investigation (CBI) chhuitir a ngaih leh ngaih loh a zir chiang dawn.
GHC-in July 12, 2017-a Mizo Carbon Product thubuai chungchang a ngaihtuahnaa order a tihchhuahah chuan, thubuai hi CBI chhuitir a ngaih leh ngaih loh zir chianna atan state sorkar aiawhte chu ACB-in Mizo Carbon a chhuina report, FIR an thehluh, May 29, 2017-a notification a tihchhuah leh hemi chungchanga a kaihhnawih department-te'n final enquiry report behchhana an hmalaknate thehlut turin a hriattir a ni.
High Court chuan, state sorkar aiawhte chu Industries leh Taxation department aṭang pawhin affidavit thehlut turin a hriattir a; affidavit-ah chuan central transport subsidy leh central capital investment subsidy scheme dil thei te, subsidy-te dawng tura thlanna atana tehfung (criteria) state-in a neihte tarlan a phût a ni.