Khawpuia in luah man bithliah tum
Cabinet Meeting hnuhnung berin a pawm tâk, 'The Mizoram Areas Urban Rent Control Bill, 2017' hnuaiah khawpuia in luah man zat biliah tum a ni. Ruahman ang chuan, in sakna senso aṭanga chhûta 10% aia tam in luah man atana bithliah a rem dawn lo.
Urban Development & Poverty Alleviation (UDPA) department hotute hnen aṭanga thu dawn danin, Mizoramin Urban Rent Controll Bill, 1974 a nei ṭhin a, mahse, mumal taka kenkawh a ni lo.
He Bill kengkawh tur hian nodal department hranpa ruat awm loin, GAD kutah a awm a, chhan hrang hrang vangin kenkawh lohin a awm reng a ni.
Tun hnuah GAD chuan Mizoramin Urban Rent Controll Bill, 1974 nodal department-ah UDPA department an ruat a. UDPA chuan hma lain, The Mizoram Areas Urban Rent Control Bill, 2017 an buatsaih a, chu chu kum 2015 khan Law & Judicial department-in an pawm tawh a, June 8, 2017-a Council of Minister ṭhukhawmin an pawm ve leh bawk.
Mizoramin Urban Rent Controll Bill, 1974 hi Assembly session hmasa berah put luh tum a ni a, pawm a nih chuan a rang thei ang bera hman nghal tum a ni. Bill atan hian rules an duang mek.
He Bill hian a tum ber chu, in neitute'n an duh hun huna an in luahte an hnawhchhuah leh luah man an tihsan ṭhin tihreh a ni. Bill hi pawm a nih chuan, in sakna senso aṭanga 10% aia sangin in luah man bithliah phal a ni dawn lo a; in neitute leh a luahtute mawhphurhna pawh siam vek a ni ang.
He dan hnuaiah hian rent controller an awm dawn a, chutah chuan in neitute leh in luahtute'n lungawi lohna an neihte chu an thlen thei dawn a, rent controller-in a chinfel hna a thawk dawn a ni.