Health Minister Thanzara'n Heroes Campaign a hawng
Mizoram State AIDS Control Society (MSACS)-in an thawhpui pawl dangte nena thisen pe tura mi zirtirna leh HIV/AIDS dona atana programme an siam thar, 'Heroes Campaign' chu nimin khan
Pachhunga University College (PUC) seminar hall-ah Health minister Lal Thanzara'n a hawng.
Health Minister chuan, khawvelah thisen thlakna siam chhuah theih a ni lo tih sawiin, "Thisen hi a tlukpui emaw, a anpui emaw khawvelin a la siam chhuak thei lo a, a hlu bik em em a, thisen pek theih hi a lawmawm hle a ni," a ti a; thla thum dana thisen pe ṭhin turin Mizo ṭhalaite a sáwm.
A hranpain mi nunna chhan ngawt a harsa tih sawiin Lal Thanzara chuan, "Thisen pek hi mi nunna chhanna remchang ber a ni. Thisen kan pek tam poh leh mi nunna kan chhan tam dawn a ni... Thisen pe a, Mizote hero ni turin ṭhalaite'n ṭan i la ang u," a ti.
Lal Thanzara chuan, thisen pe thei turin taksa a hrisel a, a fit ṭhat tâwk a ngaih thu sawiin, ṭhalaite chu taksa sâwizawi uar turin a chah a; ei leh ina fimkhur te, zuk leh hmuam leh ruih theih thila fihlimte a ṭul thu a sawi.
Health Minister chuan, thisen pe ṭhinte'n natna benvawn leh hri ṭha lo, HIV/AIDS-te an vei lo tih sawiin, HIV/AIDS donaa ṭan lakpui turin mipui a sáwm a; "Sorkar leh department ringawt hmalakna a tawk lo. Kohhran leh NGO-te kan thawh chhuah a ngai a ni," a ti.
Heroes Campaign kalpui tur chungchang hi Association for Voluntary Blood Donation (AVBD) vice president Dr Zoramdinthara'n a sawifiah a; Heroes Campaign chu thisen pek uar tura ṭhalaite zirtirna, nunna chhan nana thisen petute chu mi chhuanawm an ni tih zirtirna leh, thisen pek chu HIV/AIDS dona hmanraw pawimawh tak a nih thu tlangaupuina tur a nih thu a sawi.
Campaign hawnnaah hian PUC principal Dr Tawnenga leh MSACS project Dr Lalmalsawmi Sailo te pawhin thu an sawi bawk.
Heroes Campaign hi kalpui zel tur a ni a; ambassador atan mi pali - Miss Mizoram Rody H Vanlalhriatpuii, Miss Mizoram 2017-a pahnihna Esther Vanlalnunpuii Sailo, TBC Zaithanpuia leh Israel Lalbiakrema te ruat an ni.