BJP-in Governor an rin loh thu an puang

15th July, 2017

Bharatiya Janata Party (BJP), Mizoram Pradesh president Prof. JV Hluna chuan, Mizoram Governor Lt.Gen. Nirbhay Sharma chu Chakma Autonomous District Council (CADC) sorkar chungchanga a thil tih dan avangin an rin zawh tawh loh thu a puang.

BJP President hian nimin khan Aizawl Press Club-ah thuthar thehdarhtute a kâwm a; CADC sorkara member 10 chuan CADC sum cheng nuai 100 chuang an tichingpen tih sawiin, "Chief executive member Kali Kumar Tongchongya chuan MDC-te chu an sum lâk rûl turin lehkhain a ti a, corrupt councillor 10-te inthurualin CEM chu an paihthla ta a ni," a ti.

CADC-ah sorkar ṭha leh rintlak, corruption awm lohna a awm theih nan Mizoram BJP-in Governor hnenah MDC-te corruption-a an inhnamhnawih dan te, CADC sorkar sum latu leh an lak zatte nen an thehlut tih sawiin JV Hluna chuan, "CADC chu suspend a, MDC corruption-a inhnamhnawihte chu Enquiry Commission chhuitir a, MDC-te'n sum an hman dik loh zawng zawng rulhtir vek turin kan kan ngen a ni," a ti a; Governor pawhin dan anga thil a tih tur thu a lo sawi niin a sawi.

Prof. JV Hluna chuan, Governor chuan CADC sorkar pakuana chu ni sarih chhung atan a suspend a, chumi chhung chuan floor test a neihtir tih sawiin, hemi chungchangah hian Governor chu dan loa thil tiah a puh a; "BJP chuan kan Governor-ah hian rinna nghah ngam har kan ti hle a, amahah rinna kan nei tawh lo," a ti.

BJP President chuan, CADC chung-changah hma an la zel dawn tih sawiin, "CADC hi dissolve a, inthlan ṭhat a nih ngei theih nan hma kan la zel dawn a ni," a ti a; CADC sorkar chu ṭhiah a, inthlan ṭhat thuai an duh thu a sawi.

Zawhna chhangin Mizoram BJP hruaitute chuan, CADC-a MDC-te'n sum an hmuh tur an la lâwk a, chungte chu an hlawh tur leh thil dang atana hman turte a ni tih an sawi a, "Advance-a hlawh lak hi dan kalh a ni," an ti.

BJP hotute sawi danin, CADC sorkar term kal mekah CEM pathum an awm tawh a; kum 2013-a inthlanah Congress party-in MDC 20-ah 17 neiin sorkarna an siam a, CEM chu Dr Bhudha Dhan Chakma (tunah Mizoram sorkara minister of state) a ni. A hnuah Buddha Lila Chakma chu CEM a ni a, thla 18 hnuah CEM aṭangin paih a ni.

Kali Kumar Tongchongya chu CEM a ni veleh a; ani hian a member-pui MDC 10-te chu dik lo taka sum an lo lak lâwkte chu rûl turin a hriattir a ni. Chu'ng MDC-te chuan KK Tongchongya thil tih dan chu duh loin, an thlawpna an hnûkdâwk ta niin BJP hruaitute chuan an sawi a, "Tunah hian CEM palina nih tum Amit Kumar Chakma an nei leh mek a ni," an ti.