Lunglei SADS-in ruihhlo hâl ral

YMA sub-headquarters, Lung-lei hnuaia Sub-Hqrs. Anti Drugs Squad (SADS)-in, kum 2015 aṭanga July 13, 2017 thlenga ruihhlo an mante chu nimin khan Sub-Hqrs. YMA pisa kawtah an hâl ral.

Ruihhlo hâlna inkhawm hi Lunglei sub-hqrs. YMA vice president leh Kumpuan chairman Lalrotluanga'n a kaihruai a; YMA-in ram leh hnam humhalhna tura hma a lakna pawimawh tak chu ruihhlo tirêm tura beih a ni tih sawiin, thâ thlah loa kalpui zel a nih tur thu a sawi.

Hâl ralna inkhawm hmanpuitu John Ṭanpuia, Lunglei additional DC chuan, YMA hmalakna hrang hrang chu ropui a tih thu sawiin, "Mizoram pum huapa kum khat chhunga YMA-in ruihhlo an man hlut zawng a tam tham hle a, ruihhlo titute hi anmahni tan leh an chhungkaw tan ringawt hnawksak an ni lo a, a ti ve lo khawtlang mi leh ram thlengin kan tuar a ni," a ti a; YMA halakna ṭawiawm zel turin mipui a sáwm.

Lunglei SADS-in kum 2015 aṭanga July 13, 2017 thlenga ruihhlo an mante chu - heroin hawng 5, can 6 leh chhinsen 380; ganja kg. 2.3; Parvon Spas mûm 2,40,000; Alprozelum mum 6,580; Diazepum mûm 200; Tramadol mûm 200; Nitozepum mûm 32; sap zu ûm 6 leh rakzu fûn 2 a ni.

An thil man zawng zawng hlut záwng chu Rs. 21,59,500 vela chhût a ni. Ruihhlo kaihhnawihah mi 12 chu thubuai siamsak an ni a, mi pasarih chu home-ah dah an ni.