KHAWTHLIR

Eng awm dawn lo
PGCI, Ramrikawn leh Zuangtuia 132 kV line siam ṭhat a ngaih avangin vawiin hian Zuangtui Sub-Station-in a chawmte'n zing dar 8 aṭanga tlai dar 3 inkarah kawlphetha an hmu thei dawn lo. Kawlphetha hmu thei lo tur hi Aizawl hmar lam veng te, Lung-lei, Lawngtlai, Siaha, Mamit leh Champhai district-te an ni.

Thisen pe
Nimin khan Ailawng Branch YMA-in an din champha vawi 71-na pualin Aizawl Civil Hosptal tan Khuangchera Hall-ah thisen unit 33 an pe a, a petute mipa 31 leh hmeichhia pahnih an ni. AYUSH-in free clinic an buatsaih nghal a, mi 160 an inentir. Nimin vek khan South Lungpher Students' Welfare, Lawngtlai Branch-in Lawngtlai District-ah thisen unit nga an pe bawk.

Ar Khawthim Dai
Dr LN Tluanga, Mission Veng lehkhabu ziah, 'Ar Khawthim Dai' (An autobiography) tih chu nimin khan Synod Conference Centre-a Pi Zaii Hall-ah MBSE president Rev.Dr Lalchungnunga'n a tlangzarh.

Hnathawh thlirho
Excise & Narcotics department (END) chuan nimin khan an comissionerate conference hall-ah an department changtu secretary Lalmalsawma hoin 1st. Quarterly Review Meeting an nei.

Vote turin sáwm
Congress Legislature Party (CLP) chu nimin khan an president Lal Thanhawla, chief minister hoin Congress Bhavan-ah an ṭhu a, July 17, 2017-a India President thlannaa an vote tur an tichiang. CLP hian Mizorama MLA-te chu party sawi loin, sakhaw tih bik nei candidate Ram Nath Kovind hnawl a, sakhaw tih bik nei lo candidate Meira Kumar vote turin an sáwm a ni.

Tanpuina sem
KVK, Kolasib chuan NABARD hnuaia ‘Lac Project’ an kalpuinaah, Thingdawl Farmers’ Club member-te hnenah nimin khan ṭanpuina an sem.