VEC kutah MGNREGA dah vek duh­

BJP, Mizoram Pradesh chuan thu­chhuah siamin, Mahatma Gandhi National Rural Guarantee Act MGNREGA chu Village Employment Council (VEC)-te kuta hlân vek an duh thu an tarlang.

BJP chuan, MGNREGA job card neite inhlawhnaah, a dawngtu turte hriat­pui loha an hlawh tur lak ṭhen (cut) a awm thu an dawn thu tarlangin, "Hei hi a chhan ber ni a lang chu, MNF VC neihnaah VC kutah dah mai niin report dawn a ni a, MNF VC neih lohnaah ­erawh chuan Block Employment Council (BEC) kutah dah a ni leh thung," an ti.

Mizoram BJP chuan, "Sorkar laipui aṭanga sum lo kalte chu rualkhai taka mipuiin an dawn theih nan MNF-in VC-a thuneihna an neih lohnaah pawh VEC-te kutah dah ni vek se kan duh," an ti a; chumi chung­changah chuan a ṭul angin sorkar laipuiah bawhzui an tum thu an sawi.

Covid-19 donaa hmalakna chung­changah BJP chuan, chief minister Zoramthanga kaih­hruaia hmalakna chu ṭha an tih thu an tarlang a, "Central sorkarin buhfai a thlàwnin min pek avang leh gas a thlawna thla thum free te, loneitu te, kut hnathawktu te, kum upa lamte'n sum leh pai an dawng telte hi lawmthu kan sawi. Chutiang a hlawhtlin theih nana Mizoram sorkarin a sem chhuah hna ṭha leh hlawhtling taka a kalpui avangin Mizoram sorkar chungah lawmthu kan sawi a ni," an ti.