Zu leh ruihhlo do beihpui kan thlâk zel dawn - Excise Minister

Excise & Narcotics minister Dr K Bei­chhua chuan nimin khan Rangvamual leh Phun­chawng a tlawh a, zu siamna hmun kilkhawr deuhte drone camera hmangin an endik a; zu leh ruihhlo do beihpui an thlak zel tur thu a sawi.

Dr K Beichhua chuan, "Vawiina dan kalha zu siama hma la mekte hian an thil tih hi sim nghal turin ka hriattir a, beihpui kan thlak chhunzawm leh nghal ang. Kan ram mi tlemtê, zu leh ruihhlo vanga hna thawk thei loa kan awm te, hmeithai kan pung te, zu leh ruihhlo vanga sex lama inthunun theih lohna leh HIV hluarte veng turin mi tin ka sáwm a ni," a ti.

Phunchawng leh Rangvamuala dan kalha chête'n ram hmél an tihbalh thu sawiin Minister chuan, "Hetianga khawsa ṭhinte hi nunphung pangngaia khawsa a, eizawnna mumal dap turin ka sâwm a ni," a ti a; veng pahnihte chu veng nuam leh entawntlaka siam tura theihtawp chhuah turin veng mipui a ngen a ni.

Dr K Beichhua chuan, END-in zu leh ruihhlo an do bakah, ramri venhim thlengin an thawh mek thu sawiin, "Kan tlem thu kan sawi ngai dawn lo a, quantity aiin quality hi a takin lantir zel kan tum. Mi tlemtê ṭhahnem ngaiin ram a siamṭha thei a, chuvangin, ṭhahnemngai takin kan thawk zel ang. Hetiang taka theihtawpa thawktu kan thawktute ka chhuang hle a ni," a ti.