Vairengte-Sairang inkara ram neite'n Zangnadawmna chinfel thuai an phût

Vairengte-Sairang NH 6 & 306 4 Lane Land Owners Association hruaitute chuan nimin khan Kolasib Press Club-ah thuthar thehdarhtute an kâwm a; zangnadawmnaa an harsatna tawh chingfel tura sorkar an phût thu an sawi. Nimin vek khan Kolasib-ah kawng an zawh bawk.

Vairengte-Sairang inkar kawngpui zauhnaa ram lak tur neitute hian Kolasib Press Club aṭanga Kolasib District Forest Officer (DFO) pisa thleng kawng an zawh a; DFO hnenah zangnadawmna an dawn tura harsatna awmte chinfelsak turin an ngen. DFO chuan, an thu thlente chu GAD kaihhruaina hnuaia ṭhutkhawm hunah a thlen tur thu a lo hrilh.

Land Owners Association chairman James Vanlalringa chuan, Vairengte-Sairang NH 6 & 306 zauh turah Competent Authority of Land Acquisition (CALA) chuan 3A notification a chhuah thu sawiin, "Kawng zauhna tura ram nei zawng zawng sorkar pass leh VC pass neite tarlan a ni. Sawisel duh nei tan hun hawn a ni a, chumi hnuah 3D notification chhuah leh a nih hnuah CALA thuchhuak angin kawngin a paltlang turte ram endik a ni," a ti.

James Vanlalringa chuan, sawi duh nei tana hun hawn a nih chhungin ram neitu leh Mizoram sorkar aṭangin sawiselna a awm loh thu sawiin, "CALA chuan 3G turin ruahmanna a siam ta a, hemiah hian package indawtin NHIDCL-ah 3G approval dil a ni," a ti a; zangnadawmna pe chhuak tura ruahmanna peih vek a nih tawh hnuah EFCC department-in harsatna an siam niin a sawi.

EFCC department-in an ram nia an chhàl chhungah mimal ram tam tak a awm thu sawiin Vanlalringa chuan, "Ram neitu chhungkaw 1,751 chuang kan awm mek. Forest department ṭan chhan Mizoram District Council (Forest Act) 1955/1965 hi dan hlui tawh leh ṭan chhan tlak tawh lo a ni. He dan hi April 12, 2021 khan Guwahati High Court, Aizawl Bench chuan a nuai bo tawh," a ti.

4 Lane Land Owners Association chairman James Vanlalringa chuan, EFCC department-te'n forest reserved an tihah sorkarin town village a puang vek tawh nia sawiin, "Sorkar hmunhma tam tak Kolasib DFO pisa ngei pawh hi forest reserved chhung a ni," a ti a; EFCC department dan ṭan chhan chu sorkarin ngaihtuah chiang a, dan hlui tawh a nih avangin ṭhiah a ṭul tawha an ngaih thu a sawi.

Land Owners Association hruaitute chuan, an harsatna tawh chu July 7, 2022 khan Chief Minister hnenah ziaka an thlen thu sawiin, "Forest Minister pawh ṭum hnih kan hmu tawh. Kan thu thlen kal zelah hian Revenue department-in CALA hnenah CM-in ti tura a tih angin zangnadawmna pe chhuak turin an hriattir a, mahse, Kolasib DFO-in ram lâk chungchangah NHIDCL objection a pek avangin tun dinhmun hi kan thleng a ni," an ti.

Zangnadawmna an hmuh thuai theih nan hmalakpui tura sorkar an ngen thu sawiin hruaitute chuan, "Kan CM zahawm tak kaihhruai Mizoram sorkar hi a rang thei ang bera kan harsatnate min chinfelsak turin kan phûtin kan ngen a ni," an ti a; Kolasib district-a MLA pathumte pawh an harsatnaah a ṭul anga hmalakpui tura an phût thu an sawi bawk.

RAM NEITUTE RESOLUTION
1) NHIDCL-in four lane kawngpui zau ṭha tak an sial turah an hmalakna tiṭhuanawp zawnga EFCC department-in tun hnaia reserved forest tia ram zau tak an hauh vanga harsatna awm mek hi sorkar hian chingfel vat rawh se.
2) Mizoram District Council Act, 1956 hi mipui tana ṭangkai tawh lo leh hnawksak a ni a, paih/nuaibo a nih theih nan sorkara roreltute'n chak takin hma la rawh se.
3) Four lane kawngpui laih hna ṭan vat a nih theih nan CALA account-a zangnadawmna pawisa awm mek hi ram neitute hnenah a rang thei ang berin a pung nen min pe chhuak vat rawh se.
4) Ram neitute huan thlai hlutna leh ram leilung hlutna CALA-in min chhut chhuahsak (3G estimate) angin min pe ngei rawh se.
5) Four lane kawngpui sial tur vanga sorkarin kum hnih chuang kan huan lo rama hma la thei loa min siam tawh hnuah, tun thlenga zangnadawmna pawisa sem thei loa EFCC-in harsatna min siam hi kan hrethiam lo a, ram neitute rahbehna leh intihkhawtlai tumnaah kan ngai.
6) EFCC-in tun hnaia NHIDCL-ah forest clearance an phût ruala mimal ram chhunga compensatory afforestation leh present net value an rawn phût tel hi ram neitute thamlohna leh mipui sum dik lo taka laksak tumnaah kan ngai.
7) Ram lâk chungchangah Mizoram sorkar leh CALA ten dan angin notification an chhuah a, notification-ah hian EFCC aṭangin complaint emaw, sawi buaina CALA-in a dawng lo. Tunah 3G (award list) chhuah hnu leh zangnadawmna sum CALA account-a thun a nih vek tawh hnuah an sawi buai leh si hi ram neitute'n kan hrethiam lo tak zet a ni.