Tourism minister Robert-a'n Start-Up Fest & Competition 2022 a hawng

Mizoram Tourism Start-Up Fest & Competition 2022 chu a vawi khat nan nimin khan ṭan a ni a, Secretariat Conference Hall-ah minister of state Robert Romawia Royte-in a hawng. Minister chuan, Mizoram chu India ramah tourism policy mumal taka nei hmasa ber state a nih thu a sawi.

Tourism Start-Up Fest & Competition-in a tum ber chu - ṭhangtharte tana eizawnna ngêlnghet bul ṭanna an neih theihna tur a ni a, tel duh tan September 14, 2022 thleng Tourism department-ah business plan thehluh theih a ni.

Intihsiaknaa pakhatnain

Rs 1,50,000, pahnihnain Rs 1,00,000 leh pathumnain Rs 80,000 an dawng dawn a, mi pahnih tan consolation prize Rs 50,000 ve ve a awm bawk. Intihsiak result chu September 27, 2022 - World Tourism Day-ah puan a ni ang.

Robert Romawia Royte chuan, Tourism Start-Up Fest & Competition chu ṭhalai lehkha thiam leh hmangchang hriate kohna ni se a duh thu sawiin, "Mizoramin tourism industry-a hma a sawn zel nan leh tourism hi eizawnna tlâk leh insumdawn tawnna atan mi tam takin kan hman zel theih nan danglamna thlentu ni se, Mizoramah tourism service provider an indaih lohzia hre reng chungin intihsiakna hian mi tam tak chawk phûr se tih hi ka duhthusam leh beisei a ni," a ti a; intihsiaknaa tel zawng zawng duhsakna a hlân nghal.

Minister Robert Romawia chuan, Tourism Start-Up Fest & Competition chu tourism tihchangtlunna leh eizawnna atana mi tam zawkin an hman theihna tura kawng pawimawh tak pakhat a nih thu a sawi a, "Tourism department hi department lian leh thawktu tam tak awmna ni lo mah se, Mizorama tourism tihhmasawn nan hna nasa takin an thawk a, thawhona ṭhain rah ṭha a chhuah zel a, Mizoram chu India ramah tourism policy mumal taka nei hmasa ber state a ni," a ti.

Mizoramin bung thar a kái tih sawiin Robert Romawia chuan, "Tourism industry-a eizawnna neitute tan leh mimal sumdawngte tan rahbi ngêlnghet leh rintlak tak, inkaihhruaina leh kalphung dan leh hrai kimchang leh awmze nei policy ṭha tak sorkarin a siam tawh a ni," a ti a, chu chuan eizawnnaa tourism industry hmang tur leh hmang mek tan kawng mumal tak a sial dawn tih a sawi.

Intihsiakna hawnna inkhawm hi Tourism joint secretary V Lalengmawia'n a kaihruai a, Tourism secretary Manisha Saxena pawhin thu a sawi.