Lunglei DEO leh MZP an inbia Lungsen H/S dang zel dawn

Lungsen High School-a zirtirtu sawn chhuah a nih avanga MZP Sub-Headquarters, Lungsen-in zirlaite leh zirtirtute sikul kái tur an dan chungchangah Lunglei District Education Officer leh hotu dangte leh Lungsen MZP-te chu nimin khan an inbia a, thu lawmawm an hmuh loh avangin sikul kái tur an dang zui zel dawn.

Lungsen Post aṭanga thu dawn danin, Lunglei DEO team leh Lungsen MZP hruaitute chu Lung­sena RD Rest House-ah an inbia a; Lungsen H/S-in harsatna a tawh mek chungchang leh zirna chhunzawm a nih theih dan tur an sawiho a ni.

Lunglei DEO Lallian­zuali Bawihtlung chuan, zirlaite tana harsatna thlen zawnga hmalakna titawp tura ngenin, "Harsatna hi sorkar beng a thleng a, thuneitute'n an ngaihven reng a ni," a ti a; Lungsen H/S harsatna sutkian hun tur sawi thei lo mah se, sorkarin a hriatpui avangin a sutkian ngei a beisei thu a sawi.

Sorkar aiawhte thu kenah hian MZP Sub-Headquarters, Lungsen chuan thu lawmawm leh hmasawnna a awm rih loah an ngai a, an dinna ngaiah an din zel tur thu leh, sorkar karna atan hma­lakna lian zawka kalpui an tum thu an sawi a ni.