ASF zangnadawmna la pe chhuak lo

Vawk pûl hri, African Swine Fever vanga kum 2021-a vawk suat neitu chhungkaw 2,488 hnena zángnadawmna pek tur Rs 10,48,42,200 chu nimin thleng khan a dawng turte hnenah pek a la ni lo. Animal Husbandry & Veterinary department hotute chuan, bank lam nen hma lain pek chhuah thuai an beisei.

Vanglaini palai zawh­na chhangin AH&Vety hotute chuan, zangna­dawmna dawngtu turte bank account-a pawisa thun (transfer) dan tur an tum dan hmasaah harsatna a awm niin an sawi a, "Zangnadawmna pawisa hi single nodal sgency (SNA) account-ah thun tur niin, SNA hi public financial management system (PFMS) hnuaia kal vek tur a ni a, zangnadawmna sum tur SNA-a kan dah luh khan PFMS portal-ah a lang thei tlat lo," an ti.

AH&Vety hotute chuan, an minister hoin hmalak dan tur an sawiho tawh tih sawiin, "Hmalak dan turah sorkar laipui pawh kan ráwn tawh. A hmanhmawhthlak tawh si a, minister hoa kan sawihonaah hian PFMS-a refect leh mai turin cheque system-in bank-ah pek mai ni se kan ti," an ti. Bank lamah an tifel thawkhat tawha an ngaih thu leh bank kaltlangin district tinah pek chhuah a ngaih dawn avangin hun a duh rei mai theih thu an sawi bawk.

Mizoram sorkar chuan kum 2021 chhunga vawk suat neitute zangnadawmna pek tur sorkar laipuiah a dil a, vawk 10,910 atan Rs 11,69,94,414 an dil a ni. First instalment Rs 5,84,97,000 chu March 22, 2022 khan sorkar laipuiin Mizoram sorkar a rawn pe. Sorkar laipuiin a pek zat chiah Mizoram sorkarin a pek ve a ngai a, a vaiin Rs 11,69,94,000 a tling.

Mizoram sorkara Finance department chuan sorkar laipuiin a rawn pek leh Mizoram sorkarin a pek ASF zangnadawmna sum, chhungkaw 2,488 hnena pek tur Rs 10,48,42,200 chu July 1, 2022 khan AH&Vety department hnenah a pe a ni.

ASF vanga kum 2021-a vawk suat neitute hnena zangnadawmna pek tur sum chu July 26, 2022 khan AH&Vety minister Dr K Beichhua'n Vety Polyclinic Hospital conference hall-ah a tlangzarh tawh a; mahse, tun thlengin a dawngtu turte hnenah pek a la ni ta lo a ni.