August 2, 2022-a chesual Naupang bo thiin hmu

Nimin khan August 2, 2022 tlaia Sihhmui-Léngpui inkara lirtheia chesuala Tlawng luia tla lut mi pahnihte ruang hmuh a ni a, pakhat zawk lak chhuah a nih laiin, pakhat erawh chu lak chhuah hman a nih loh avangin nimin tlai thleng khan mi tlawmngaite'n an zawng zui zel.

Thu dawn danin, nimin zing dar 9:30 vel khan Buichali kâiah Tlawng luia naupang ruang láng hmuh a ni a, mi tlawmngaite'n Chang­sil kàiah lo chângin, chawhma dar 10:20 velah an la chhuak a; a thawmhnaw hâk aṭangin Malsawmkima (10) s/o C Lalfakzuala, Chaltlang Lily Veng a ni tih finfiah a ni.

Malsawmkima ruang hi Sairang Dinthar YMA Hall-ah thlahna hun hman a nih hnuah Aizawl panpui a ni a, Civil Hospital Aizawla endik a nih hnuah an inah lâk niin, nimin tlai dar 6 khan vui a ni.

Nimin chawhnu lam khan Malsawmkima pa C Lalfakzuala (39) h/o Rebecca Lallawmzuali ruang pawh a fapa an hmuhna aṭanga hla vak loah hmuh ve leh a ni a; mahse, lak chhuah a nih hmain a bo leh a, zawn zui zel a ni.

C Lalfakzuala te pafa hi an chetsual aṭanga chawlhkar khat chhung zawn a nih hnuah August 9, 2022 khan khawtlang anga zawna hnatlang tihtawp a lo ni tawh a ni.