NE Statewide Protest huaihawt a ni
North East Students Organisation (NESO)-in hmarchhak pum huapa lungawi lohna lantirna, NE Statewide Protest a huaihawt chu MZP General Headquarters pawhin an zâwm a, nimin khan MZP Conference Hall-ah Sit-in Protest an huaihawt.
Lungawi loh lantirna hi MZP president Lalnunmawia Pautu-in a kaihruai a, NESO finance secretary Ricky Lalbiakmawia’n hmarchhak puma lungawi lohna lantir a nih chhan a sawi.
NE thil phût zingah Armed Forces (Special Powers) Act, 1958 hlih te, Citizenship (Amendment) Act, 2019 hlih te, hmarchhak biala state boundary leh international boundary-a harsatna awmte a rang lama sutkian te, hmarchhak mite tan hnam leh nunphung mila educational policy duante a tel.
NE Statewide Protest hi hmarchhak state hrang hrangah huaihawt a ni a; All Assam Students’ Union, All Arunachal Pradesh Students’ Union, Khasi Students’ Union, All Manipur Students’ Union, Garo Students’ Union, Tripura Students’ Union leh Naga Students’ Federation-te an kalpui a ni.
NESO THIL PHUTTE
1. Armed Forces (Special Powers) Act, 1958 hlih ni rawh se.
2. Citizenship (Amendment) Act, 2019 hlih ni rawh se.
3. NE-a state ramri leh international ramria harsatna awmte a rang lama sutkian.
4. NE mite tan hnam leh nunphung mila educational policy duan ni rawh se. NE-ah university, technical and vocational institute, medical college, engineering college leh research centre a tam thei ang ber din belh ni se, college leh university-ah hetiang lam zirna dah belh ni rawh se.
5. India sorkarin NE bial ei leh bâra kan intodelh nan economic development policy ṭha tak duang rawh se.
6. Act East Policy atan NE chhungah ngei administrative centre dah ni rawh se.
7. Sorkar laipuiin hna nei lo (unemployment) harsatna sukiang rawh se. NE special employment zone puan ni se, central office hrang hranga grade III & IV hnaah tualchhung mi leh sate dah ni rawh se.
8. Constitution-ah NE mipui tan ram leilung hausakna chungchangah special constitutional status siam ni rawh se.
9. NE India tan time zone hran siam ni rawh se.
10. India sorkarin Myanmar aṭanga himna zawnga lo tlânte tan chenna, ei leh in tur bakah, zirna an chhunzawm theih nan ruahmanna siam rawh se.