Thil nung humhalhna hmunte'n Mizoram zau zawnga 9.48% a khuh

Principal chief conservator of forest (PCCF) Jitendra Kumar, EFCC secretary ni bawk chuan, Mizorama nungcha humhalhna hmun - tiger reserve, national park leh wildlife sanctuary-te ram khuh zau zawng chu Mizoram zau zawng aṭangin 9.48% a nih thu a sawi.

Ministry of Environment, Forest & Climate Change hnuaia Wildlife Crime Control Bureau (WCCB) leh Mizoram sorkara Environment, Forest & Climate Change department chuan nimin khan Chief Wildlife Warden Conference Hall-ah 'Capacity building workshop on intelligence collection, investigation and handling of wildlife offence cases’ an buatsaih a, PCCF Jitendra Kumar hian a hawng a ni.

Jitendra Kumar chuan, Mizorama tiger reserve, national park leh wildlife sanctuary-te ram khuh zau zawng chu state pumpui zau zawng aṭangin 9.48% a nih laiin, India ram pum huapa protected area-in a khuh zau zawng chu India ram zau zawng aṭangin 5.02% a nih thu a sawi a, "National average aiin Mizoram kan sang zawk a ni," a ti.

Jitendra Kumar chuan, Mizoram chu ram dang nena ramri thui tak nei a nih avangin nungchaa sumdawnna a hluar thu leh mihring leh nungchate inkarah harsatna a tam thu a sawi a, "Human animal conflict vênna atana pawimawh ber chu social fencing - ramsa leh nungcha humhalh kawnga mipui náwlpui thinlung hneha an ṭawiawmna dawn a ni," a ti.

PCCF Jitendra Kumar chuan, nungcha humhalh bikna hmun chhehvela chêngte'n hlâwkna an têl theih nan eco-tourism a pawimawh thu a sawi bawk.

Zirhona hi chief wildlife warden Lalrammawii Sailo-in a kaihruai a, EFCC department mi leh sa bakah, police officer ṭhahnem tak an tel a, WCCB regional director (Eastern Region) Agni Mitra leh a hote'n thil pawimawhte an zirtir a ni. Zirhona hi vawiinah chhunzawm a ni ang.
WCCB hotute chuan, India hmarchhak state-te dan loa ramsa hmanga sumdawnna hluarna hmun a nih thu an sawi a; a bik takin samak kî leh saphu káwr hmanga sumdawnna a hluar thu an sawi bawk.