Congress a sorkar leh ngei a ṭul - Zodintluanga

MPCC treasurer Zodintluanga Ralte, MLA chuan, MNF party kaihhruai sorkarin Mizoram an tihchhiat mek siamṭha turin Congress party bak an awm lo a, an sorkar leh ngei a ṭul niin a sawi.

Mizoram Pradesh Youth Congress Committee-in a din thar MPYCC Social Media department puala training nimina buatsaihah thu sawiin Zodintluanga chuan, "Hmasawnna ruhrel lian leh rotling tam takte MNF sorkarin tichhe vekin an kalsan a, kum 10 chhung Congress sorkar khan sum dinhmun ṭha takah kan dah. Tunah MNF sorkar kum li chhung hian nawmchenna leh leiba bakah, sum harsatna khurpuiah min hruai lut leh ta. Hemi siamṭha leh tur hian Congress kan sorkar leh ngei a ṭul a ni," a ti.

Zodintluanga Ralte chuan, MNF-in an sorkar theihna tura an hmatheh SEDP-a beidawng zawng zawngin Congress party an zawm vek dawn nia sawiin, "Kum 2023-ah hian Mizoram dinhmun chhe mek tung ding leh tur hian sum enkawl thiam leh eirûknaa fihlim Pu Lalsawta kaihhruai Congress party lo chu sorkar tur an awm lo," a ti a; party hming thlâk vanga sorkar theih ni se chuan MNF(N) leh ZNP-te an sorkar daih tawh tur thu leh tunah ZPM tia an invuah avangin an sorkar dawn tihna a nih loh thu a sawi bawk.