Ayush Aapke Dwar khàr a ni

Directorate of AYUSH, College of Veterinary Sciences & Animal Husbandry leh State Medicinal Plants Board (SMPB)-te'n Azadi Ka Amrit Mahotsav hnuaia ramhmul damdawi awlsam zawka mi tinin an neih theihna tura an kawtkaia chhawpsakna 'Ayush Aapke Dwar' an buatsaih chu nimin khan khàr a ni a, minister of state TJ Lalnuntluanga'n a hmanpui.

TJ Lalnuntluanga chuan, Mizoram ramngawah ramhmul damdawi chi hrang hrang a tam tih sawiin, EFCC department pawhin ramngaw tichereu si loa ramhmul damdawi leh ramngaw aṭanga mihring mamawh mipuiin ṭangkai taka an hman theihna turin hma a la ṭhin niin a sawi a, "Pi leh pu aṭangin Mizote'n ramhmul damdawi chi hrang hrang ṭangkai takin kan hmang tawh ṭhin a, damdawi kan neihte hi a chereu loh nana venhim hi kan mawhphurhna a ni," a ti.

Minister chuan, "Damdawi dangte angin mihring taksaah nghawng ṭha lo a neih ve loh avangin ramhmul damdawi hi khawvelin a uar telh telh a, hei aia nasain kan la uar chho dawn tih a hriatthiam theih," a ti a; ramhmul damdawi hman mek leh la hmelhriat lohte awmna ramngaw hlutzia hria a, ṭangkai taka hmang chunga humhalhna lamah uar leh zuala ṭan la turin kal khawmte a chah.

Ayush Aapke Dwar khàrna inkhawmah hian CVSAH dean Dr Lalnuntluangi Hmar leh Women & Child Development director Lallianpuii te pawhin thu an sawi.

Ayush Aapke Dwar hi India ram zalenna champha kum 75-na lawmna péng pakhat a ni a, September 2021-ah ṭan a ni. India ramah ram hectare 75,000 tuamin ramhmul damdawi ṭiak nuai 75 sem a ni a, Mizoramah pawh Health minister Dr R Lalthangliana hoin nikum September thla khan hawn a ni.

Ramhmul damdawi ṭiak Mizoramin a dawnte chu hripui lên lai a nih avangin in tinah sem a rem lo a, SMPB office aṭangin a duh apiang tan sem chhuah a nih bakah, Thenzawla AYUSH Hospital aṭangin sem a ni. Medicinal plant chi hrang 15 chu mi 600 hnenah 27,154 sem a ni a, ram hectare 5-a zauah phun a ni.