MoRTH Minister-in Siasi-Chakhei kawng siam chhe lutuk enfiah a tum - BJP

BJP, Mizoram Pradesh chuan thuchhuah siamin, sorkar laipuia Road Transport and Highways minister Nitin Gadkari chu Siaha district-a Siasi leh Chakhei inkar kawng siam hna thawh chhe lutuk, restricted tender hmanga Kamrul Laskar-a hnathawh dan a hmunah rawn enfiah a tum niin an tarlang.

Mizoram BJP chuan, Siasi-Chakhei kawng siamna turin Mara Autonomous District Council-a N Zakhai kaihhruai sorkarin sum sengin project an siam tih sawiin, "Project a hlawhtlin hnuah chief minister Pu Zoramthanga'n MADC-in an thawk thei lo tur anga sawiin restricted tender hmangin Kamrul Laskar (KR Construction) a thawhtir a ni," an ti.

BJP tarlan danin, Siasi-Chakhei kawng siamna turin sorkar laipuiin CIRF scheme hnuaiah Rs 47,22,41,887 (vbc. 47.22) a pe a, kum 2019-ah thawh ṭan a ni. Contractor Kamrula'n a thawk chhe hle a, a nih tur angin a siam lo niin BJP chuan an tarlang.