Early Childhood Care & Education Sikul 331 velah hawn a ni tawh

School Education department chuan nimin khan SCERT Auditorium-ah SCERT-in course hrang hrang a neiha zir chhuakte chawimawina an buatsaih a, School Education minister Lalchhandama Ralte-in a hmanpui. Minister chuan, sikul 331 velah Early Childhood Care & Education hawn a nih tawh thu a sawi.

Lalchhandama Ralte chuan, Mizoramah mipui rin ngam sorkar sikul ṭha a awm theih nan training chhuakte chu an thawhnaah missionary rilru púa an hna thawk turin a chah a, "Zirna siamṭha turin zirtirtute tan training neih ṭhat a pawimawh hle. Zirtirtute grade sang zawka an kai dawnin training an kal ṭha em tih chu tehfung atan hman a ṭul ta hle a ni," a ti.

Certificate course hrang hrang - English Language Teaching, Early Childhood Care & Education (ECCE) leh Guidance & Counselling-te chu zirna atana hlu tak an nih thu sawiin Minister chuan, "ECCE hi sikul 331 velah hawn a ni tawh a, ECCE hi ṭha taka kalpui a nih chuan enrolment pawh a pung dawn," a ti a, sorkarin ṭan a la zel dawn tih a sawi.

SCERT hian kum 2018 aṭangin B.Ed Special Education (Hearing & Visual) a kalpui a, seat 30 ve ve a awm. Certificate course in English Language Teaching-ah zirtirtu 22, Certificate Course in Early Child Care & Education-ah zirtirtu 24 leh Certificate course in Guidance & Counselling-ah zirtirtu 38-in an zir zo a ni.