India President tur thlan a ni

India President thlangin nimin khan India ram pumah vote thlak a ni a, Mizo­ramah pawh MLA-te'n Assembly Secretariat committee room-ah vote an thlak.

President thlannaah hian BJP leh an thawhpuite candidate chu MP hlui leh Bihar Governor hlui Ram Nath Kovind a ni a, Congress party leh an thurualpuite candidate chu MP hlui leh Lok Sabha speaker hlui Meira Kumar a ni.

President thlannaah hian Mizoram MLA 40-te chuan vote hlut zawng 8 ṭheuh an nei a, Mizoram MLA-te vote hlut zawng belhkhawm chu 320 a ni. Mizoram MLA zingah minister C Ngunlianchunga leh S Laldingliana te chu damlohna thila Mizoram páwna an awm avangin vote an thlak thei lo a, MLA dang zawngin vote an thlak. Lok Sabha MP CL Ruala leh Rajya Sabha MP Ronald Sapa Tlau-te chuan New Delhi-ah vote an thlak nia thu dawn a ni. Anni pahnih vote hlut zawng chu 708 ve ve a ni.

Thu dawn danin, Congress party MLA-te chuan Meira Kumar an vote a, MNF MLA-te'n Ram Nath Kovind an vote thung. MPC MLA pakhatin a vote erawh hriat a ni lo.

President thlannaa vote tlate chu July 20-ah New Delhi-ah chhiar a ni dawn a; President ni lai, Pranab Mukherjee term chu July 24, 2017-ah a tâwp dawn avangin President atana thlan tlin chu July 21-ah President atan lak luh beisei a ni.

MLA-te vote hlut zawng chu - MLA zatin state mihring zat sem (divide) tur a ni a, chumi chuak chu 1,000-in sem leh tur a ni. Mihring zat hi kum 1971 chhiarpuia mi zat hman tur a ni a, hei hi kum 2026 thleng hman a ni ang. Kum 1971-a Mizorama mihring zat chu 3,32,390 a ni a; Mizoram MLA pakhat vote hlut zawng chu 8 a ni.

Mizorama MLA 40 zinga pahnihin vote an thlak theih loh avangin, Mizoramin President thlannaa vote a thlak hlut zawng chu vote 1720 a ni.