MPC-in ILP nei lo dap chhuak turin sorkar ngen

MPC party president Lalhmangaiha Sailo hoa office bearer-te nimina an pisaa ṭhukhawm chuan thuchhuah an siam a; hnam dang dan loa Mizorama awmte dap chhuah kawnga ṭan la thar turin sorkar an ngen.

MPC thuchhuah chuan, tun hnaiah Aizawl leh district headquarters hrang hrangah hnam dang dan loa awm, inner line permit (ILP) nei lo an tam leh ta hle nia sawiin, an ngaimawh thu a tarlang a, "Hetianga ualau leh zalen taka hnam dang phalna nei loa sumdawng leh inhlawhfa a awm zawng zawngte a rang thei ang bera dapchhuah hna thawka ṭan la thar leh turin Mizoram sorkar kan ngen a ni," an ti.

MPC party chuan, MPC ṭhalaite'n Ṭhuampui leh Zemabawk inkar kawngpui NH-54 chhia siamṭha tura thuchhuah siama sorkar an ngenna Mizoram sorkarin ngai pawimawh a, hmalak tuma an inbuatsaih chu lawmawm an tih thu an sawi a; February 23, 2017-a Undivided Zemabawk Joint NGO Committee leh Mizoram sorkar inremna anga chhuanlam dang siam tawh loa chak taka NH-54 siam ṭha turin sorkar an ngen a ni.

Nimina MPC OB-te ṭhukhawm hian June 15-a thi, MPC ṭhalai treasurer K Lalbiaksanga sûnna hun an hmang bawk.