Khuarel chhiatna tuarte ṭanpuina tur Pawl pathumin Central YMA-ah an hlan

Kumin June thlaa Mizo­rama khuarel chhiatna tuartute ṭanpui­na tura Central YMA-in vehbur a khawn kal zelah nimin khan Mizo Professional Footballer Association (MPFA), Young Paite Association (TPA) leh Mandalay Mizo Welfare (MMW), Myanmar-te'n ṭanpuina atana sum leh pai an khawn khawmte CYMA hnenah an hlan.

MPFA hian Lungleia July 6-a Exhibition Match an buatsaiha sum an hmuh Rs. 1.18,462 chu an adviser Vanlalmuana'n CYMA hruaitute kutah a hlan a; a hlanna hun, CYMA Committee Room-a neihah MPFA member Jeje Lalpekhlua, Robert Lalthlamuana, Zohmingliana Ralte leh Vanlalrova te pawh an tel.

YPA, Churachandpur, Manipur-in an sum leh pai khawn chhuah zawng zawng Rs. 1,53,120 leh buhfai ip 183 chu CYMA hnenah an hlan a; sum leh pai an khawnte hlan tura Mizorama an lo kalna senso pawh a hranpain anmahni'n an intum a ni. YPA aṭang hian CYPA president T Khailianthang leh general secretary Lianmuanthang Valte te bakah, an CEC member mi eng emaw zat an tel.

Mandalay Mizo Asso­ciation pawhin Mizo­rama khuarel chhiatna tuarte ṭanpui nan Rs. 20,000 an khawn khawm a; chu chu nimin khan Mandalay Mizo Wel­fare hruaitu aiawhin Lalhmingthangi'n CYMA hnenah a hlan bawk.

Khuarel chhiatna tuar­te ṭanpuina turin YMA branch 10-in CYMA-ah vehbur an khawn khawmte an thehlut tawh a, Chhandamna Kohhran-in Rs. 30,000, Punjab National Bank-in Rs. 10,000, thawhtu hriat loh pakhatin Rs. 10,000 an thawh tawh bawk a; CYMA lut tawh zawng zawng hi Rs. 4,08,370 a ni.

Central YMA-in YMA branch hrang hrangte an huam chhung ṭheuha vehbur khawn tura a tih hi July 2017 chhungin CYMA pisaah thehluh tura tih a ni.