CM-in St. Xavier's College building a hawng

Lengpuia St. Xavier's College din thara academic building block hmasa ber chu nimin khan chief minister Lal Thanhawla'n a hawng. He college hi Jesuit Society hmalaknaa din a ni.

Chief Minister chuan, zirna chu hmasawnna tinreng innghahna a nih thu sawiin, "Ram chhunga ziak leh chhiar thiam state zinga a sangber pawl kan ni hi zirna vang a ni a, hei hi missionary hmasate'n zirna an lo ngaih pawimawh vang a ni. Vawiina kan dinhmunte hi missionary-te'n a tirah zirna lama hma an lak vang a ni ti ila kan sawi sual lo ang," a ti.

India rama college ṭha 10 zinga pali enkawltu Jesuit Society-in Mizorama college an rawn din chu lawmawm a tih thu sawiin CM Hawla chuan, "Mizoram hian kan mamawh aia tam college kan nei tawh a, a thar hawn hi ka phûrpui lo a, a chhan chu lehkhathiam mah se, thiamna zîktluak nei lo, kut hnathawh zak leh hmusit, nu leh pate châwm hlâwm ni hreh lo kan chher chhuak tam ang tih ka hlauhthawnpui vang a ni," a ti a; chutih rualin, Jesuit Society chu khawvel huap pawha zirna in ṭha leh hmingthang, zirlai chhenfakawm leh chhuanawm tak tak chherchhuaktu an nih avangin an sawmna a pawm thu a sawi.

Lal Thanhawla chuan, Mizoramin primary school leh pawl 12 thleng zirna ṭha pawl a neih tawh thu sawiin, "Zirna sang zawk leh technology lamah rualawhna a la na deuh a, hei hi chona lian tak a ni. Hmun tam tak leh Mizoram pawh tiamin, zirna-inṭha ber ber chu Catholic kohhran enkawl a ni fo. St. Xavier’s College hi hun lo kal zelah college ṭha leh hmingthang a nih theihna atan duhsakna ka hlan e," a ti.

Hawnna inkhawmah hian Aizawl bishop Most Rev. Stephen Rotluanga leh Jesuit Society aiawhin Darjeeling Province hotu Father Kinley Tsering te pawhin thu an sawi.

St. Xavier’s College building hi November 2016-ah sak ṭan a ni a, tun dinhmunah academic building pakhat chiah sak zawh a la ni. Building dangte sak mek niin, swimming pool leh football field-te pawh siam tum a ni a; pawl 11 leh B.A first semester-ah zirlai 35-in kuminah bul an ṭan a ni.

St. Xavier's dintu Jesuit Society enkawl mek zingah Mumbai-a St. Xavier’s College, Kolkata-a St. Xavier’s College, Chennai-a Loyala College leh Bengaluru-a St. Joseph’s College-te chu India rama college ṭha 10 thlan chhuah zingah an tel mek a ni.