Mizorama HIV/AIDS do dan sawiho

MIzoram State AIDS Control Society (MSACS) hotute leh Centre for Disease Control and Prevention (CDC), USA-a mithiamte'n nimin khan Mizorama HIV leh ruihhloa inchiu ṭhinte chungchanga hmalakna an thirho.

CDC-a HIV Prevention Branch hotu Dr Irene Benech chuan, HIV kai hmuh chhuahna hmunah rang taka hmalak nghal zel a nih loh chuan HIV/AIDS chu chak takin a darh ṭhin tih a sawi a, "Inthlahdahna hun a awm lo a, invênna tihchak dan kawng ngaihtuah thar zel a ṭul," a ti.

MSACS project director Dr Lal-malsawmi Sailo chuan, CDC sum hmanga Mizorama Project Sunrise hmalakna chu NACO hnuaia MSACS hnathawh tichak lehzualtu a ni tih a sawi a; Mizote chu mimal nungphung leh khawsakna kawnga zêp an la ngah avangin HIV lama hmalak a harsat thu a sawi bawk.

Meeting-ah hian Dr Irene Benech hi CDC technical specialist Sampath Kumar, Project Sunrise programme specialist Aditya Singh leh NETSU lama mi Pankaj Chauduri ten an ṭawiawm a; vawiin hian HIV/AIDS donaa thawk NGO hrang hrangte hmun an tlawh kual dawn a ni.