Thawhhona tur bul ṭanna hun buatsaih

Mizoram sorkar leh Japan International Cooperation Agency (JICA)-te thawhhona tur, 'The Project on Capacity Enhancement for Sustainable Agriculture & Irrigation Development in Mizoram' bul ṭanna hun nimin khan Irrigation & Water Resources (IWR) department directorate committee room-ah buatsaih a ni.

JICA team leh line department hrang hrang - IWR department, Agriculture department, Horticulture department leh Soil & Water Conservation department hotute meeting-ah an tel a; JICA team chu chief advisor Shigeki Yamaoka hoin mi pali an tel thung.

Project hi ei leh bara Mizorama intodelh theihna tura JICA-in master plan a siam tawh tihhlawhtlinna atana hmalakna a ni a; October 26, 2016 khan inremna 'Record of Discussions' chu Mizoram sorkar aiawhin chief secretary Lalmalsawma leh JICA aiawhin Takema Sakamaoto ten an ziak tawh a ni.

Technical Cooperation Project chu kum nga, July 2017 - June 2022 chhung awh tur a ni a, project kalpuina turin Mizorama RD block pali - Bilkhawthlir (Kolasib district), Aibawk (Aizawl district), Serchhip (Serchhip district) leh Champhai (Champhai district) te thlan a ni.