Kawnpuiah lei chê vangin in pali ṭhiat

Tun hnaia ruahsur nasa vanga Kawnpui Hmarvenga dinhmun hlauhawma awm chenna in pathum leh leiminin a chhilh in pakhat, Assam type vek chu July 15 leh 16 khan Kawnpui V/C-I kaihhruainain Kawnpui Hmarveng leh Venglai Branch YMA-te'n hna-tlangin an ṭhiat.

Kawnpui Hmarvenga NH-54 kawngpui chung-ah lei a chêt nasat avangin Ramthanga in a che tel a, July 15, Inrinni chaw-hnu khan ṭhiah a ni. Pa-thianni chawhma in-khawm bàn khan Kawnpui Hmarvenga Lalramhluna in leh Chhuanvawra in ṭhiah leh a ni a; leiminin a chhilh Thanmawia in chu an ṭhiat bawk. Kawnpui Venglaia C Lalramngaii in leh C Lalchhanhima inte pawh an kawmchár leimin thenfaisak a ni.

Kawnpui V/C-I huam chhungah hian Pathianni zana ruahsur nasa vangin chhungkaw 10 chu an inah riak ngam loin an riak chhuak a; a hlauhawm vanga khawtlang hruai-tute'n hmun danga khawsa rih tura an tih chhungkaw pali an awm bawk.