KHAWTHLIR

DC-te ruat
Home department chuan silai chungchangah hriattirna a tichhuak a; air rifle, airgun leh air pistol-te register chak zawka kalpui a nih theih nan DC-te chu July 31, 2018 thleng Air Gun Licensing Authority-ah ruat an nih thu tarlangin, "Airgun kaihhnawih case reng reng chu Licensing Authority-te hian Standard Operating Procedure milin an ngaihtuah ang," a ti.

Court chawlh
Nimin July 17 aṭanga July 21 thleng khian Mizorama Court-te chuan nipui chawlh an hmang dawn a, hei vang hian thubuai hmanhmawhthlak bik tih loh chu ngaihtuah a ni dawn lo. Thu dawn danin, Court hi tun kar chhung châwl dawn mah se, district hrang hranga first class magistrate-te chu an ṭhu dawn a, thubuai hmanhmawhthlak bikte an ngaihtuah dawn a ni.

Kawng ping
July 12, 2017-a Mamit district-a Saithah khaw dáiah kawngpui a bal avangin Marpara kawngah lirthei an kal thei lo a; maxicab kal theih tura dâwl a nih hnuah motor tê (LMV)-te chu an kal thei a, 407 truck leh a aia liante erawh an kal tlang thei rih lo nia thu dawn a ni. PWD hotute chuan, HMV chin kal thei tur chuan metre 30-a thui leh metre 10-a sang lung rem phawt a ngai niin an sawi.

Aizawl SP thar
Neihchungnunga, IPS chu Aizawl SP thar atana dah a ni a,, nimin khan a hna thar hi a zawm. Aizawl SP kal chhuak, Lalhuliana Fanai, MPS pawhin nimin vek khan a hna thar, Fire & Emergency Services director hna a zawm ve nghal bawk.